Жиноят ишлари бўйича Нарпай туман судида 2 ёшли боланинг ўлимига сабаб бўлган эр-хотинга суд ҳукми ўқилди. “Дарё” суд ҳужжатлари билан танишди.
Маълум бўлишича, 2006 йилда туғилган Д.И. 2025 йилнинг декабрь ойида ўзидан уч ёш катта Р.А. билан Самарқанд шаҳридаги тунги клублардан бирида танишган. Д.И. оила аъзоларига Р.А.га уйланишини айтганида аввалги турмушидан фарзанди борлигини билганликлари учун уларнинг муносабатларига қарши бўлишган. Шундан сўнг жуфтлик шаръий никоҳ асосида оила қуриб, шаҳардаги хонадонлардан бирини ижарага олиб, яшай бошлаган.
Тергов жараёнида аниқланишича, Р.А. фарзанди аввалги турмушидан 2023 йилда туғилгани, ажрашгач, уни онасининг қарамоғида қолдириб, Самарқанд шаҳрига ишлаш учун келганини айтган. Унинг билдиришича, онаси бетоб бўлиб қолганидан кейин фарзандини ижарага уйга олиб келишга мажбур бўлган.
“Фарзандимни олиб келсам, бизга оғирлиги тушмаслигини, уни ўз ўғлидек кўриб, тарбиялашга ёрдам беришини айтганди”, дейди Р.А.
Шундан кейин болани олиб келиб, 31 январдан 15 февралга қадар унга нисбатан мунтазам зўравонлик қилишган. Уни қўл ва оёғи, шунингдек, телефон қувватлагичининг сими билан уриб, айрим ҳолларда боланинг бош қисмига тепишиб, оғир тан жароҳати етказишган.
Ижара уйи эгасининг суддаги кўрсатувига кўра, дастлаб боланинг танасида ҳеч қандай жароҳат бўлмаган. Орадан бир неча кун ўтиб эса унинг кўз атрофлари кўкариб, аҳволи оғирлашганини кўрган. Шунингдек, эр-хотин баъзан кичик ёшли болани тунги вақтларда хонада ёлғиз қолдириб кетишган, боланинг йиғлаган овозини эшитган пайтлари унга ўзи овқат бериб, қараб турганини маълум қилган.
2026 йилнинг 15 февраль куни боланинг аҳволи кескин ёмонлашиб, кўнгли айниб қайт қилишни бошлаган. Шундан сўнг у шифохонага олиб борилган. Бироқ шифокорлар кўрсатган муолажаларга қарамасдан, жабрланувчи 18 февраль куни вафот этган.
Д.И. ҳам судда дастлаб болага қараб туришга рози бўлганини айтиб, онаси ишга кетган вақтларда болага ўзи қараганини, бола йиғлаб, инжиқлик қилгани учун уни бир неча марта урганини тан олган.
“Онаси ишга кетганда йиғлаб, тинчимас эди. Уни тарбиялаш мақсадида қўлим билан урганман. Бир марта телефон қувватлагичининг сими билан ҳам урганман”, дейди Д.И.
Р.А. бола телефонда кўп вақт ўтказгани, кейин телефон сўраб йиғлагани ва гапга кирмагани учун бир неча марта унинг қўли ва юзига шапалоқ туширганини билдирган.
“Телефонда кўп ўтириши зарарли деб ўйлаб, телефон бермай қўйгандим. Шунда йиғлаб, инжиқлик қиларди. Жаҳлим чиқиб, икки-уч марта қўли ва юзига урганман”, дея кўрсатма берган аёл.
Суд-тиббий экспертизасига кўра, боланинг ўлими бош миянинг лат ейиши, энса суягининг синиши ва бош мия пардалари остига қон қуйилиши оқибатида юз берган. Экспертизада унинг танасида турли вақтларда етказилган кўплаб жароҳатлар мавжудлиги ҳам аниқланган.
Судланувчилар айбига иқрор бўлиб, қилмишидан пушаймонлигини билдирган. Д.И. ҳали ёшлиги, фарзанд тарбиялаш тажрибасига эга бўлмагани ва ҳаракатлари бундай оғир оқибатга олиб келишини билмаганини айтиб, енгиллик сўраган.
Суд ҳукми билан Жиноят кодексининг 126-1-моддаси 8-қисми “г” бандида назарда тутилган жиноятни содир этганликда айбдор деб топилган. Д.И.га нисбатан 11 йилга, Р.А.га нисбатан эса 8 йилга озодликдан маҳрум қилиш жазоси тайинланган.
