Самарқанд шаҳрида нонушта пайтида хотини билан жанжаллашиб, уни пичоқлаб ўлдирган 49 ёшли эркакка ҳукм ўқилди. “Дарё” суд ҳужжатлари билан танишди.
Суд маълумотларига кўра, 1998 йилда турмуш қурган эр-хотиннинг бир нафар фарзанди бўлган. Турмуш қурганидан кўп ўтмай аёл ишга чиққан. Эркак уни мунтазам равишда хиёнатда гумон қила бошлаган. Хотинининг ишга, бозорга ёки ота-онасиникига қатнови, шунингдек, бошқа фарзанд кўришни истамаслиги оиладаги жанжалларга сабаб бўлиб келган.
“Тўйимиздан кўп ўтмай хотиним менинг рухсатимсиз ишга чиқиб кетди. Шундан сўнг унинг феъл-атвори ўзгарди, уни хиёнатда гумон қила бошладим. Лекин бирор марта аниқ бир киши билан ушламадим”, деди судланувчи.
Эркакнинг таъкидлашича, мазкур рашк ва келишмовчиликлар йиллаб давом этган. Ҳатто 2023 йил ноябрида эр-хотин АҚШга бориб яшай бошлаган даврида ҳам низолар тинмаган.
2026 йил 7 январь куни эр-хотин Самарқандга қайтиб, бир уйда, бироқ алоҳида хоналарда яшай бошлаган. Узоқ йиллар давомида хотинини хиёнатда гумон қилиб келган эркак бирга яшашни истамаслигини айтиб, ажрашишни таклиф қилган. Бироқ аёл бунга рози бўлмаган.
Фожиа 14 февраль куни содир бўлган. Соат 10:00 ларда уйғониб, нонушта тайёрлаган эркак спиртли ичимлик ичиб, хотинини уйғотган ва улар дастурхонга ўтирган.
Судланувчининг кўрсатувига кўра, нонушта пайтида хотини ундан нега ўқрайиб ўтирганини сўраган. Шундан сўнг эркакнинг жаҳли чиқиб, стол устидаги пичоқни олиб, аёлнинг ўнг биқинига зарба берган. Иккинчи зарбани беришга уринганида пичоқнинг учи букилиб қолган. Шундан сўнг у даҳлизга ўтиб, иситиш печи устида турган бошқа пичоқни олиб келган.
Ошхонадан қочиб чиқаётган аёл остонага қоқилиб йиқилгач, эркак унинг орқа қисмига бир неча марта пичоқ билан зарба берган. Шундан сўнг пичоқни ташлаб, қўшни ҳовлидаги акасиникига чиққан ва қариндошларига хотинини ўлдирганини айтган. Воқеа жойига профилактика инспектори ва яқинлари етиб келган.
Марҳуманинг укаси судда опаси ва поччаси ўртасидаги муносабатлар ёмонлашганидан тўлиқ хабардор эмаслигини, опаси бирор марта ҳам шикоят қилиб келмаганини, фақат жиянидан АҚШда жанжаллашганларини эшитганини билдирган.
Суд-тиббий экспертизаси аёлнинг ўлимига ўткир қон кетиши сабаб бўлганини аниқлаган. Психиатрия экспертизаси эса эркак жиноят вақтида ўз ҳаракатларини тўлиқ англаганини кўрсатган.
Жиноят ишлари бўйича Нарпай туман суди ҳукми билан эркак Жиноят кодексининг 97-моддаси 2-қисми “ж” банди билан (қасддан одам ўлдириш) айбдор деб топилган. Унга 17 йил муддатга озодликдан маҳрум қилиш жазоси тайинланган.
