Англиянинг “Ливерпуль” клуби собиқ бош мураббийи Юрген Клопп Португалия терма жамоаси ҳужумчиси Криштиану Роналдунинг Ўзбекистон дарвозасига киритган иккита голи (5:0) ҳақида ўз фикрлари билан ўртоқлашди.
“Энг эътиборлиси, Криштиану Роналду биринчи ўйиндаги кескин танқидларга ўзининг иккита голи билан муносиб жавоб қайтара олди. Мен буни дарҳол пайқадим. У 41 ёшида ҳам ақл бовар қилмас даражада ўйин намойиш этди. Буни кўриб чин дилдан хурсанд бўлдим. Шу ёшга кириб ҳам ишлар юришмай қолганда унинг ҳамон шунчалик куюниши — шунчаки ақл бовар қилмас ҳолат. Унинг танқидларга қандай реакция билдиргани эса таҳсинга сазовор”, дея Клоппнинг сўзларини келтирмоқда Goal нашри.
Эслатиб ўтамиз, 41 ёшли ҳужумчи Ўзбекистонга қарши кечган учрашувда дубль муаллифига айланди. Португалия терма жамоаси эса йирик 5:0 ҳисобида ғалаба қозонди.
Маълумот учун, футбол бўйича 2026 йилги Жаҳон чемпионати 11 июндан 19 июлга қадар давом этади. Гуруҳ босқичининг ҳал қилувчи 3-турида Португалия терма жамоаси Колумбияга қарши майдонга тушади. Ўзбекистон эса Конга ДР билан ўйнайди. Ушбу учрашувлар 28 июнь куни бўлиб ўтади.
