АҚШнинг Ҳьюстон шаҳридаги “NRG” стадионида ЖЧ-2026 гуруҳ босқичининг 2-туридан ўрин олган Португалия ҳамда Ўзбекистон терма жамоалари ўртасидаги учрашув бўлиб ўтди. Қизиқарли ва кескин курашлар остида ўтган баҳс европаликларнинг 5:0 ҳисобидаги ғалабаси билан якунланди. Ушбу ўйинда португалиялик ҳужумчи Криштиану Роналду бир қанча тарихий рекордларни янгилади.
- Энг ёши улуғ дубль муаллифи: Учрашувнинг 6 ва 39-дақиқаларида Ўзбекистон дарвозасини аниқ нишонга олган 41 ёш-у 138 кунлик Роналду Жаҳон чемпионатлари тарихида битта ўйинда икки бор гол урган энг ёши улуғ футболчига айланди. Аввалги рекорд унинг азалий рақиби Лионель Мессига тегишли эди (Аргентина сардори ЖЧ-2026 доирасидаги Австрияга қарши ўйинда дубльга эришганида 38 ёш-у 363 кунлик бўлган эди).
- Португалия тарихидаги энг яхши тўпурар: Ўзбекистон миллий жамоаси дарвозасига киритилган голлар Роналдунинг мундиаллардаги умумий голлари сонини 10 тага етказди. Шу тариқа, у Жаҳон чемпионатларида 9 та гол урган афсонавий Эйсебиони ортда қолдириб, Португалия терма жамоаси тарихидаги энг сермаҳсул тўпурарга айланди.
- Олтита мундиалда гол урган илк футболчи: Шунингдек, у 2006, 2010, 2014, 2018, 2022 ва 2026-йилги Жаҳон чемпионатларида гол урган илк ва ягона футболчи сифатида ҳам тарихга кирди.
Қизиғи шундаки, португалиялик ҳужумчи мундиалларда урган барча голларини фақат гуруҳ босқичи ўйинларида киритган. Роналду ҳали бирор марта Жаҳон чемпионатлари плей-офф босқичида гол уришни уддалай олмаган.
Эслатиб ўтамиз, К гуруҳининг ҳал қилувчи 3-тур баҳслари 28 июнь куни бўлиб ўтади. Унда пешқадамлар — Португалия ва Колумбия ўзаро тўқнаш келса, Ўзбекистон Конго ДР терма жамоаси билан плей-офф масаласини ҳал қилади.
