Швеция терма жамоасининг афсонавий собиқ ҳужумчиси Златан Ибрагимович 2026-йилги Жаҳон чемпионатининг 1/16 финалида Португалия ва Хорватия терма жамоалари ўртасида кечган учрашувдаги баҳсли VAR қарори юзасидан ўз фикрларини билдирди.
Ибрагимовичнинг фикрича, ўйиннинг сўнгги дақиқаларида Хорватиянинг бекор қилинган голи ҳисобга олиниши керак эди.
“Футбол баъзан ақл бовар қилмас даражада шафқатсиз бўлиши мумкин. Ким нима дейишининг менга қизиғи йўқ. Менимча, Хорватия ўзини алдангандек ҳис қилишга тўла ҳақли. Такрорий лавҳаларни кўрдим, аммо Гвардиолнинг голида кимдир офсайдда бўлганини исботлайдиган етарли далилни ҳануз кўрмадим”, дейди Златан.
Шунингдек, у VAR тизимининг футболчилар руҳий ҳолатига таъсирини ҳақида гапирди:
“Жаҳон чемпионати плей-офф босқичида ўйиннинг сўнгги сонияларида гол бекор қилинаётган бўлса, вазият мутлақо аниқ бўлиши керак. Мен учун эса бундай аниқлик йўқ. Ушбу гол ҳисобга олиниши лозим эди. Хорватия мағлубиятдан қутулганига ишонганди. Футболчилар голни нишонлаётган, мухлислар эса қувончга тўлган бир пайтда, бир неча сониядан сўнг барчаси тортиб олинди. Айнан шундай лаҳзалар жамоаларни руҳий жиҳатдан синдиради. Биз ажойиб гол ҳақида эмас, яна бир VAR можароси ҳақида гапиряпмиз. Португалияни ғалаба билан табриклайман. Аммо Хорватия ўрнида бўлганимда, бугун майдонни футбол мендан ниманидир тортиб олгандек туйғу билан тарк этган бўлардим”.
Эслатиб ўтамиз, учрашувнинг иккинчи бўлимига қўшиб берилган вақтда Хорватия ҳимоячиси Йошко Гвардиол ҳисобни тенглаштирганди. Бироқ бош ҳакам Эспен Эскос VAR тавсиясидан сўнг голни бекор қилди.
Такрорий вазият таҳлилига кўра, тўп Гвардиолга етиб келишидан аввал ҳужумчи Игор Матанович унга тегинган, шу пайтда эса ярим ҳимоячи Марио Пашалич офсайд ҳолатида бўлган. Шу сабабли гол инобатга олинмади.
Мазкур учрашув 2:1 ҳисобида Португалия фойдасига якунланди ва жамоа Жаҳон чемпионатининг чорак финалига йўл олди.
