Португалия терма жамоаси 2026 йилги Жаҳон чемпионати учун якуний таркибни эълон қилди. Эътиборли жиҳати, ушбу турнир қайдномасидан 41 ёшли ҳужумчи Криштиану Роналду ҳам жой олди.
Терма жамоа бош мураббийи Роберто Мартинес томонидан эълон қилинган таркиб ва “Ан-Насср“ ҳужумчисининг ушбу рўйхатга киритилиши бугунги куннинг энг асосий мавзусига айланди.
Роналду учун ушбу мусобақа фаолиятидаги олтинчи Жаҳон чемпионати бўлади ва бу футбол тарихидаги мутлақ рекорддир. Криштиану саралаш босқичида 5 та гол уриб, жамоасининг энг яхши тўпурари бўлди, жамоадошлари эса турнирдаги асосий мақсад айнан Роналду билан бирга ва у учун Жаҳон Кубогини қўлга киритиш эканини таъкидламоқда.
Португалия АҚШ, Канада ва Мексика мезбонлик қиладиган турнирга жуда кучли ва мувозанатлашган таркиб билан йўл олади.
Эслатиб ўтамиз, ЖЧ-2026 гуруҳ босқичида Португалия терма жамоаси “К“ гуруҳида Ўзбекистон, Колумбия ва Конго терма жамоаларига қарши майдонга тушади.
Маълумот учун, Ўзбекистон терма жамоаси мундиалнинг иккинчи тури доирасида 23 июнь куни Криштиану Роналду бошчилигидаги Португалия терма жамоаси билан ўйнайди. Мазкур беллашув Тошкент вақти билан соат 22:00 да АҚШдаги “Хюстон” стадионида старт олади.
