Фирибгарликда айбланиб, Молдовада қўлга олинган шахс Ўзбекистонга экстрадиция қилинди. Бу ҳақда ИИВ матбуот хизмати хабар берди.
Интерполнинг Ўзбекистон ва Молдова Миллий марказий бюролари ҳамкорлигидаги мувофиқлаштирилган тезкор тадбирлар натижасида фуқаро Кишинёв шаҳрида ушланган. Зарур экстрадиция жараёнлари якунлангач, қидирувдаги шахс жиноий жавобгарликка тортиш учун Ўзбекистоннинг ваколатли идораларига топширилган.
Хабарда қидирувдаги шахснинг ёши, у қачондан буён қидирилаётганига аниқлик киритилмаган.
Май ойининг бошларида ўта йирик миқдорда фирибгарлик қилган фуқаро Перудан Ўзбекистонга олиб келинганди. 6 июнь куни фирибгарлик учун 6 йил қидирувда бўлган ўзбекистонлик Туркияда ушлангани хабар қилинганди. Одам савдоси жиноятини содир этиб қочиб юрган яна бир нафар ўзбекистонлик Туркияда ушланиб, ватанга қайтарилганди.
