Шанба куни, 23 май куни кечқурун Оқ уй яқинида отишма содир этилди. Гумонланувчи Махфий хизмат агентлари билан отишмада жароҳат олиб, касалхонада вафот этди.
BBC’га кўра, шанба куни соат 18:00 атрофида эркак сумкасидан қурол олиб, Оқ уй яқинидаги 17-кўча ва Пенсилвания авенюси кесишмасидаги маъмурий бино ёнида ўт очган. Махфий хизмат ходимлари зудлик билан жавоб бериб уни жароҳатлаган. Гумонланувчи шифохонага олиб борилган ва ўша ерда вафот этган.
Отишмада тасодифий йўловчилардан бири яраланган, бироқ Махфий хизмат унинг аҳволи ҳақида қўшимча тафсилотларни очиқламади. Хизмат ходимлари орасида жабрланганлар йўқ. Ҳозирда ҳодиса юзасидан суриштирув давом этмоқда, Оқ уй атрофидаги йўллар бутунлай ёпиб қўйилган.
Журналистлар эвакуация қилинган
Ўқ овози эшитилиши билан Оқ уйдаги журналистлар зудлик билан брифинг залига олиб кирилган. АBC телеканалининг Оқ уйдаги катта мухбири Селина Ванг томонидан эълон қилинган видеода унинг ўқ овозлари остида хавфсиз жойга яширинаётгани акс этган.
Ким ҳужум қилди?
BBC’нинг АҚШдаги ҳамкори — CBS телеканали ҳуқуқ-тартибот идораларидаги манбаларига таяниб, ҳужумчининг шахсини маълум қилди. У 21 ёшли Носир Бест бўлиб, унинг шахси Махфий хизмат ва пойтахт полициясига маълум бўлган. Носир Бест руҳий касалликлар билан даволанган.
Маълум бўлишичаб Бест 2025 йилнинг июль ойида ҳам Оқ уй ҳудудига киришга уриниб, Махфий хизмат томонидан ҳибсга олинган ва шундан сўнг психиатрия шифохонасига жойлаштирилган. У Вашингтонда 18 ойдан бери яшаб келаётган эди ва ҳужумда револвер тўппончасидан фойдаланган.
Дональд Трамп ва расмийларнинг муносабати
Отишма содир бўлган вақтда АҚШ президенти Дональд Трамп Оқ уйдаги қароргоҳида бўлган. Шунга қарамай, Махфий хизмат ушбу ҳодиса давлат раҳбари хавфсизлигига ҳамда идора амалиётларига ҳеч қандай таъсир кўрсатмаганини, барча хавфсизлик чоралари назорат остида эканини маълум қилди.
Дональд Трамп ўзининг Truth Social ижтимоий тармоғидаги саҳифасида Махфий хизмат ва ҳуқуқ-тартибот идораларига жиноятчини зарарсизлантиришда кўрсатган “тезкор ва профессионал ҳаракатлари” учун миннатдорчилик билдирди. Президент ушбу ҳужумчини кескин қоралаб, унинг ўтмиши зўравонликларга бой эканини ҳамда АҚШнинг энг қадрли бош қароргоҳига нисбатан руҳий хасталик даражасида муккасидан кетганини қайд этди. Шунингдек, у ушбу воқеа Оқ уй мухбирлари кечки овқатидаги отишмадан атиги бир ой ўтиб содир бўлганини эслатиб ўтди.
