АҚШда 25 апрель куни президент Дональд Трамп иштирокидаги журналистлар учун зиёфат ўтказилаётган меҳмонхонада отишма юз берган эди. Вашингтон суди отишма уюштирган шахсга президентга суиқасд қилишга уриниш айбловини қўйди. Бу ҳақда Reuters хабар берди.
Калифорниянинг Торренс шаҳридан бўлган 31 ёшли Коул Аллен айбдор деб топилса, умрбод қамоқ жазосига ҳукм қилиниши мумкин. Унга яна иккита айблов қўйилган: зўравонлик жиноятини содир этишда ўқотар қуролдан фойдаланиш ва давлат чегаралари орқали ўқотар қуролни ноқонуний олиб ўтиш. Эркакнинг ўзи суддаги биринчи эшитувда ўз айбига иқрор бўлмаган, аммо айбсизлигини ҳам билдирмаган.
Прокурор Жоселин Баллантин айбланувчи Вашингтонга олиб келган қуроллар орасида 12 калибрли милтиқ ва учта пичоқ борлигини айтди.
Вашингтондаги зиёфатда отишма
25 апрель куни оқшомда АҚШ президенти Дональд Трамп ва бошқа юқори мартабали шахслар иштирокида Оқ уй мухбирлари уюшмасининг йиллик тантанали кечки зиёфати бўлиб ўтаётган Washington Hilton меҳмонхонасида отишма содир бўлди. Коул Аллен металл детекторли назорат пункти яқинида ўт очиб, тадбирга бостириб киришга уринди. Ўқлардан бири Махфий хизмат ходимига тегди, бироқ уни зирҳли нимча қутқариб қолди. Гумонланувчи қабул ўтказилаётган залга кираверишда қўлга олинди.
Трамп, унинг рафиқаси Мелания ва маъмурияти аъзолари зиёфатдан эвакуация қилинди, меҳмонлардан ҳеч ким жабрланмади. Ҳибсга олинган шахс ўз нишони Қўшма Штатлар маъмурияти вакиллари бўлганини айтган. Бироқ у тўғридан-тўғри Дональд Трампнинг исмини келтирмаган. Қабулда АҚШ вице-президенти Жей Ди Венс, давлат котиби Марко Рубио ва мудофаа вазири Пит Ҳегсет ҳам иштирок этаётганди.
Оқ уй раҳбари ўзининг Truth Social ижтимоий тармоғида ҳужумда гумонланувчининг суратларини эълон қилди. CNN телеканали ва The New York Post газетаси уларда тасвирланган эркак Калифорниядан бўлган 31 ёшли Коул Аллен эканини аниқлади.
Алленнинг LinkedIn платформасидаги профилида у ўйинларни ишлаб чиқишга қизиқадиган муҳандис-механик экани айтилади. Шунингдек, у C2 Education фирмасида репетитор бўлиб ишлаётгани ҳам кўрсатилган.
