АҚШ президенти Дональд Трамп иштирокида 25 апрель куни бўлиб ўтаётган тадбирда отишма юз берди. Ўт очган шахс Калифорнияда яшовчи 31 ёшли Коул Аллен экани аниқланди. Бу ҳақда The New York Post хабар берди.
Ҳодиса Washington Hilton меҳмонхонасида Оқ уй мухбирлари иштирокидаги йиллик зиёфатда юз берган. Номаълум шахс меҳмонхонада ўт очганидан сўнг қўлга олинган. Зиёфат тўхтатилиб, Трамп, унинг рафиқаси Мелания ва меҳмонлар эвакуация қилинган. Алленнинг ўт очиши оқибатида АҚШ Махфий хизматининг бир нафар ходими яраланган. Трамп уни зирҳнимча қутқариб қолганини айтмоқда.
Федерал ҳуқуқ-тартибот манбаларига кўра, Аллен Калифорния штатида ўқитувчи бўлиб ишлаган. У меҳмонхонага кириб, Трамп ва тахминан 2500 меҳмон йиғилган зал томон югурганидан сўнг қўлга олинган. Отишма соат 20:30 атрофида, тадбирнинг ички хавфсизлик текшируви ҳудудида, меҳмонларга салат тортилаётган пайтда бошланган. Трамп залдан зудлик билан олиб чиқилган, ҳукумат аъзолари эса стол остига яширинган ва кейин эвакуация қилинган.
“У назорат пунктига югуриб кирганида милтиқ, тўппонча ва бир нечта пичоқ билан қуролланган эди”, деди Колумбия округи полицияси бошлиғи Жеффри Керолл.
Трамп ўқ овозларини эшитганини, аммо хавфдан дарҳол хабардор бўлмаганини айтди.
“Мен шовқин эшитдим ва патнис тушиб кетган бўлса керак деб ўйладим”, деди у.
Президент 30 кун ичида янги Оқ уй мухбирлари иштирокидаги зиёфат ташкил қилишини маълум қилди. У ҳужум АҚШ ва Исроилнинг Эрон билан давом этаётган уруши билан боғлиқ эмаслигига ишонишини айтди.
“Бу мени Эрондаги урушда ғалаба қозонишдан тўхтата олмайди. Отишманинг унга алоқаси бор-йўқлигини билмайман. Биздаги маълумотларга кўра, бундай деб ўйламайман. Мен яшашни истайман, чунки бу мамлакатни буюк қилмоқчиман. Шунинг учун ҳам яшашни истайман”, деди Трамп.
Президент қуролларнинг меҳмонхона ичкарисига қандай олиб кирилгани ҳақидаги саволга жавоб беришдан бош тортди. Меҳмонлар ташқи хавфсизлик периметридан ўтиши керак эди, у ерда улардан чипта ёки зиёфатолди тадбирига таклифнома кўрсатиш талаб қилинган. Қурол бор-йўқлигини текшириш фақатгина банкет зали киришидан бевосита олдин амалга оширилган.
Гувоҳлардан бирининг айтишича, Аллен бар аравачалари сақланадиган ва ўша пайтда “хавфсизлик хизмати бўлмаган” вақтинчалик хонадан чиқиб келган.
“У ўша хонада эди... қуролни сумкадан ёки шунга ўхшаш нарсадан олди”, деди воқеа устида ишлаётган кўнгилли гувоҳ Ҳелен Мабус ва қурол “узун” эканини ҳамда ”оддий қуролга ўхшамаслигини” қўшимча қилди.
Тадбир давомида 4–8 марта ўқ узилгани айтилмоқда. АҚШ Ғазначилик котиби Скотт Бессент айнан шу меҳмонхонада 1981 йилда Жон Ҳинкли томонидан АҚШнинг 40-президенти Рональд Рейганга қарата ўқ узилганини ҳам эслатиб ўтди.
