“Реал Мадрид”нинг франциялик ҳужумчиси Килиан Мбаппе футбол бўйича Испания чемпионатининг 2025/26 йилги мавсумида энг яхши тўпурарга айланди.
Ҳужумчи 38-турнинг “Атлетик Бильбао”га қарши кечган уй учрашувида (4:2) ўз ҳисобига гол ёздириб қўйди. У жорий турнир доирасида ўтказган 31 та ўйинида жами 25 та гол уришга муваффақ бўлди. Тўпурарлар пойгасида иккинчи ўринни “Мальорка” ҳамда Косово терма жамоаси форварди Ведат Мурики эгаллади – у рақиблар дарвозасини 23 бор ишғол қилган.
Мбаппе Испания чемпионати якунларига кўра кетма-кет иккинчи марта энг яхши тўпурар унвонини қўлга киритмоқда. Ла Лигада бундай натижага охирги марта “Барселона”нинг аргентиналик собиқ ҳужумчиси Лионель Месси эришган эди. Месси 2016/17 йилги мавсумдан бошлаб кетма-кет беш йил давомида ҳаммадан кўп гол урганди. Мбаппе “Реал” сафидаги дебют мавсумида 31 ўйинда 34 та гол урган эди.
Ла Лиганинг жорий мавсум чемпиони “Барселона” 38-тури доирасидаги сафар ўйинида “Валенсия”га 1:3 ҳисобида имкониятни бой берди.
Ғолиблар сафида голларга Хави Герра (66-дақиқа), Луис Риоха (71) ва Гидо Родригес (90+7) муаллифлик қилди. Мағлубиятга учраган жамоанинг ягона жавоб голини Роберт Левандовски (61) киритди. Польшалик ҳужумчи каталонияликлар сафида ўзининг сўнгги учрашувини ўтказди.
“Барселона” Испания чемпионатини 94 очко билан якунлади. Жамоа турнир тугашига уч тур қолганда миллий чемпионат ғолиблигини нақд қилиб қўйган эди. Бу клуб учун тарихдаги 29-чемпионлик унвонидир. Ушбу кўрсаткич бўйича каталонияликлар фақатгина “Реал”дан (36 та чемпионлик) ортда қолмоқда. Мадридликлар мавсумни иккинчи ўринда якунлади.
Жорий мавсум давомида “Барселона” ўз майдонида ўтказилган барча 19 та ўйинда ғалаба қозониб, Испания чемпионати рекордини ўрнатди. 38 та тур давомида каталонияликлар ҳисобида битта дуранг ва 6 та мағлубият мавжуд.
“Шунингдек, “Реал Мадрид” ўз майдонида “Атлетик Бильбао”ни қабул қилиб, 4:2 ҳисобидаги ишончли ғалабани тантана қилди.
Учрашувдаги биринчи голни 12-дақиқада “Реал” ҳужумчиси Гонсало Гарсия киритди. Ярим ҳимоячи Жуд Беллингем 41-дақиқада “қаймоқранглилар”нинг устунлигини мустаҳкамлади. Меҳмонлар форварди Горка Гурусета эса 45+1-дақиқада ҳисобдаги фарқни қисқартирди. “Реал” ҳужумчиси Килиан Мбаппе 51-дақиқада “Атлетик” дарвозасига учинчи голни урди, 89-дақиқада эса мезбонлар футболчиси Браим Диас ҳисобни йирик кўринишга олиб келди. Меҳмонлар ҳужумчиси Урко Исета 90+1-дақиқада яна бир голга муаллифлик қилди — 2:4.
“Реал” Испания чемпионатининг жорий мавсумида иккинчи ўринни банд этди. “Қаймоқранглилар” 38 ўйинда 86 очко жамғарди. Бильбаонинг “Атлетик” жамоаси эса 45 очко билан 12-поғонадан жой олди.
.Шунингдек, “Мальорка”, “Жирона” ва “Реал Оведо” қуйи лигага равона бўлди.
