“Барселона” бош мураббийи Ҳанси-Дитер Флик келаётган ёзги трансфер ойнаси учун клуб олдига қўйиладиган асосий вазифаларни маълум қилди. Sport.es нашрининг хабар беришича, немис мутахассиси жамоанинг Чемпионлар Лигасида муваффақият қозониши учун таркибни янада кучайтириш зарур деб ҳисобламоқда.
Манбага кўра, Флик клуб академияси — “Ла Масиа” ишидан ва ёш футболчиларнинг ўсишидан мамнун. Бироқ унинг фикрича, таркибда 26–28 ёш оралиғидаги, етакчиликни ўз зиммасига ола биладиган футболчилар етишмаяпти.
Мураббийнинг фикрича, айнан шу ёшдаги ўйинчилар ёш иқтидорлар ва тажрибали футболчилар ўртасида “кўприк” вазифасини ўташи керак. Бу жиҳат “Барселона” 2015-йилдан бери орзиқиб кутаётган Чемпионлар Лигаси ғолиблиги учун курашда жуда муҳим ҳисобланади. Ҳозирда жамоада мавжуд бўлган ушбу ёш тоифасидаги футболчилар эса мураббий талаб қилган даражага ва етакчилик хислатларига эга эмас.
Шу сабабли, “Барселона” ёзда нафақат маҳоратли, балки жамоани ўз ортидан эргаштира оладиган ва “чемпионлик менталитети”га эга бўлган футболчиларни сотиб олишни кўзламоқда.
Трансфер режалари билан бир қаторда, клуб Фликнинг ўзи билан ҳамкорликни давом эттириш бўйича музокаралар олиб бормоқда. Яқинда мутахассиснинг агенти Пини Захави Барселонага ташриф буюрди ва томонлар амалдаги келишувни 2028-йилгача узайтириш бўйича оғзаки келишувга эришдилар. Ла Лиганинг жорий мавсуми якунланганидан сўнг томонлар ўртасида расмий шартнома имзоланиши кутилмоқда.
