Россия президенти Владимир Путин Украинадаги уруш якунига яқинлашаётганини маълум қилди. У бу ҳақда 9 май кунги матбуот анжуманида маълумот берди.
Путиннинг сўзларига кўра, Россия ва Украина делегациялари 2022-йилда Истанбулда келишувга эришган ва уни маʻқуллаган. Бироқ шундан сўнг Франция президенти Эммануэл Макрон Россия раҳбарига қўнғироқ қилиб, Украина бундай тарихий ҳужжатларни “чаккасига тўппонча тиралган ҳолда” имзолай олмаслигини айтган.
Россия ўз қўшинларини Киевдан олиб чиқиб кетиши керак бўлган ва Москва бунга розилик билдирган. Аммо ўша пайтдаги Буюк Британия бош вазири Борис Жонсон Россия билан келишув имзолаш мумкин эмаслигини, чунки у адолатсиз эканини айтган.
“Украина томони вакили бу ҳужжатларни маъқуллаган бўлса, унинг адолатли ёки адолатсизлигини ким белгилайди? Бу ерда адолатсизлик нимада, буни ким ҳал қилади? <...> Украинага ёрдам ваъда қилишди ва Россия билан ҳануз давом этаётган қарама-қаршиликни авж олдиришди. Ўйлайманки, иш якунига етмоқда, аммо бу жиддий масала”, деди Путин.
Россия 2024-йилдан буён урушни тугатиш шарти сифатида Украинадан Донбасс, Луганск, Запорожье ва Херсон вилоятларидан қўшинларини олиб чиқиб кетишни талаб қилиб келди. Украина бир неча бор ҳудудий ён беришларга бормаслигини, бу ҳудудларнинг эгалланиши келгусидаги ҳужумлар учун плацдарм вазифасини ўташини таъкидлаган.
Ҳозирда Россия ва Украина ўртасида 2026 йил 9 майдан бошлаб уч кунлик сулҳ амал қилмоқда. Келишув ҳар икки томондан минг нафардан ҳарбий асир алмашилишини ҳам ўз ичига олади.
“Бу илтимосни шахсан мен билдирганман. Президент Владимир Путин ва президент Владимир Зеленскийга уни қўллаб-қувватлагани учун миннатдорлик билдираман”, деган эди АҚШ раҳбари Дональд Трамп.
