АҚШ президентининг глобал ҳамкорлик бўйича махсус вакили Паоло Замполли 2026-йилда ўтказиладиган футбол бўйича Жаҳон чемпионатида Эрон терма жамоасини Италия билан алмаштиришни таклиф қилди. Бу ҳақда Financial Times нашри хабар бермоқда.
Замполлининг сўзларига кўра, у ушбу ташаббус билан шахсан Дональд Трамп ва FIFA президенти Жанни Инфантинога мурожаат қилган.
“Мен асли италияликман. Италия терма жамоасининг АҚШда ўтадиган турнирда иштирок этишини кўриш мен учун катта орзу. Тўрт карра жаҳон чемпиони бўлган бу жамоа мундиал тўрида муносиб ўринга эга бўлиш учун барча сифатларга эга”, дея Замполли сўзларини келтирмоқда нашр.
Ҳозирча FIFA ва Дональд Трамп ушбу таклифга расмий муносабат билдиргани йўқ. Нашрнинг таъкидлашича, Трамп ушбу “футбол дипломатияси”дан НАТО бўйича муҳим иттифоқчиси — Италия билан совуқлашган муносабатларни тиклаш учун фойдаланиши мумкин. Аввалроқ, Рим папаси ва Италия бош вазири Жоржа Мелони билан юзага келган сиёсий зиддиятлар сабаб икки давлат ўртасидаги алоқалар бир оз таранглашган эди.
Эслатиб ўтамиз, 21 апрель куни Эрон спорт вазири Аҳмад Донямали терма жамоанинг Жаҳон чемпионатидаги иштироки борасида ҳали якуний қарор қабул қилинмаганини маълум қилган эди. АҚШ ва Эрон ўртасидаги сиёсий вазият ҳамда хавфсизлик масалалари жамоанинг мундиалга келишини мураккаблаштирмоқда.
Маълумот учун, Италия терма жамоаси саралаш босқичида кутилмаганда мағлуб бўлиб, кетма-кет учинчи бор Жаҳон чемпионати йўлланмасидан қуруқ қолган эди. Агар FIFA Эроннинг иштирокидан воз кечишини расмийлаштирса ва Замполлининг таклифи қўллаб-қувватланса, “мовий гвардия” турнирга “wild-card” (iмтиёзли йўлланма) орқали қўшилиши мумкин бўлган тарихдаги илк жамоага айланиши мумкин.
