FIFA президенти Жанни Инфантино келажакда Жаҳон чемпионати иштирокчилари сонини кенгайтириш эҳтимоли ҳақида гапирди, шунингдек, Италия терма жамоасининг дунё биринчилигига чиқа олмагани бўйича ҳазил қилди. 2026 йилги турнирда 48 та терма жамоа иштирок этмоқда.
“Бутун дунёни янада кўпроқ жалб қилиш учун Жаҳон чемпионатини 64 та терма жамоагача кенгайтириш имкониятини аллақачон ўрганиб чиқдик. Бу масала FIFA Кенгашига топширилди, бироқ ҳозирча келинг, 48 та жамоа иштирокидаги ушбу илк турнирдан завқланайлик. 64 та терма жамоа бўлса, эҳтимол, Италия саралашдан ўта олган бўларди. Уларнинг иштирокини кафолатлаш учун ҳатто жамоалар сонини 208 тага етказишимиз ҳам мумкин эди”, дейди Инфантино.
Аввалроқ FIFA президенти Ўзбекистон миллий терма жамоасига 2026 йилги Жаҳон чемпионати олдидан омад тилаган эди.
Ўзбекистон миллий терма жамоаси тарихда илк бор FIFA Жаҳон чемпионати финал босқичига йўлланма олди. 2026 йилги мундиал АҚШ, Канада ва Мексикада бўлиб ўтади.
Маълумот учун, Ўзбекистон терма жамоаси Жаҳон чемпионатидаги илк ўйинини Мексикада ўтказади, қолган икки учрашув эса АҚШдаги стадионларда бўлиб ўтади. “Оқ бўрилар” 18 июнь куни биринчи турда Колумбияга қарши майдонга тушади. Ушбу учрашувга Мексика пойтахтидаги “Ацтека” стадиони мезбонлик қилади.
Жамоа иккинчи тур доирасида 23 июнь куни Криштиану Роналду бошчилигидаги Португалия терма жамоаси билан ўйнайди. Мазкур беллашув АҚШдаги “Хюстон” стадионида ўтказилиши белгиланган. Гуруҳдаги сўнгги учрашув 28 июнь куни “Атланта” стадионида Конго Демократик Республикасига қарши бўлиб ўтади.
