АҚШ президенти Дональд Трамп маъмурияти Жаҳон чемпионати гуруҳ босқичининг сўнгги турида Мисрга қарши майдонга тушадиган Эрон миллий терма жамоасининг АҚШда қолиш муддатини яна бир кунга узайтириб, уларга ўйиндан икки кун олдин мамлакатга киришга рухсат берди.
23 июнь, сешанба куни АҚШ Ички хавфсизлик вазирлиги (DHS) ушбу қарорни тасдиқлади. Шунга қарамай, Эрон терма жамоасига ўйиндан сўнг АҚШ ҳудудида тунаб қолиш ҳанузгача тақиқланган.
“Эрон жамоасига 26 июнь куни Сиэтл шаҳрида бўлиб ўтадиган учинчи ўйини учун мамлакатга учрашувдан икки кун олдин келишга рухсат берилди”, деди вазирлик матбуот котиби Al Jazeera нашрига.
Вазирлик мазкур қарор сабабларини батафсил очиқламаган. Бироқ бу ҳолат Теҳрон ва Вашингтон ўртасидаги ўт очишни тўхтатиш келишуви ҳамда дипломатик музокаралар ортидан икки давлат ўртасидаги зиддиятларнинг бир оз юмшаши билан бир вақтга тўғри келмоқда.
“Эрон терма жамоасидан ўйин тугаган куниёқ мамлакатни тарк этиш талаб қилинади. Умумий хавфсизлик чоралари ва протоколлари ўзгаришсиз қолган. Биз футболчилар, мураббийлар штаби ва мухлислар учун мусобақани имкон қадар хавфсиз ўтказиш мажбуриятига содиқ қоламиз”, дея қўшимча қилган DHS вакили.
Эронлик футболчилар ва спорт расмийлари мусобақа мезбонининг уларга нисбатан бундай муносабатидан кескин норози бўлмоқда. Эрон терма жамоаси гуруҳ босқичидаги барча учта ўйинини АҚШнинг Ғарбий соҳилидаги шаҳарларда ўтказишига қарамай, ўз ўқув-машғулот базасини Мексикада жойлаштиришга мажбур бўлган.
АҚШ расмийлари Эрон терма жамоасига нисбатан киритилган бу чекловлар хавфсизлик нуқтаи назаридан эканлигини таъкидлаб келади. Бироқ халқаро миқёсда танилган спортчиларнинг АҚШда қолиши кимга ва қандай таҳдид солиши мумкинлиги борасида аниқ тушунтириш берилмаган.
