АҚШ президенти Дональд Трампнинг маслаҳатчилари унга ОАВга ўйлаб ўтирмай интервью беришни камайтиришни тавсия қилмоқда. Чунки бундай суҳбатлар унинг баёнотлари зиддиятли эканини яна бир бор намоён этади, дея хабар берди The Wall Street Journal газетаси ўз манбаларига таяниб.
Нашр манбаларига кўра, Трампнинг яқин сафдошлари унга матбуот билан камроқ мулоқот қилишни бир неча бор маслаҳат берган. Америка етакчиси маълум муддат уларнинг тавсиясига амал қилган, аммо кейин яна аввалги одатига қайтган.
Қайд этилишича, Трамп гоҳида Оқ уй матбуот котиби Каролин Левиттни ҳазил тариқасида чалғитиб, журналист билан суҳбатлашгани ва унга муҳим янгиликларни айтганини, Левитт эса бу ҳақда кейинроқ нашрдан билиб олишини таъкидлаган.
“Шунингдек, Трамп Truth Social тармоғида постлар эълон қилишда ҳам мунтазам равишда ‘импровизация’ қилади. Масалан, 7 апрель куни Эрон цивилизация сифатида йўқ бўлиб кетиши мумкинлиги ҳақидаги таҳдидли хабар унинг миллий хавфсизлик режасининг бир қисми бўлмай, ўз тўқимаси эди”, дея маълум қилган АҚШнинг исми ошкор этилмаган расмийси.
Аввалроқ АҚШ президенти Дональд Трамп 16 апрель куни Эрон билан урушни тугатиш бўйича келишувга яқин орада эришишига ишонч билдириб, бунинг учун Покистонга ташриф буюриши мумкинлигини истисно этмаганди.
- Трампнинг шов-шувли баёнотлари
Хусусан, у Теҳрон АҚШ талабларини бажармаса, “бутун бир цивилизация ҳалок бўлиши мумкинлигини” айтган, шунингдек, ён беришдан бош тортган тақдирда “дўзах олови” ёғилишидан огоҳлантирган эди. Шу билан бирга, Трамп инфратузилмага зарбалар берилиши мумкинлигини айтиб, ҳатто Эроннинг барча электр станцияларини йўқ қилиш эҳтимоли ҳақида ҳам гапирганди.
