Мадриднинг “Реал” клуби “Манчестер Сити” ярим ҳимоячиси Родрини ўз сафига қўшиб олиш ҳаракатига тушди. “Қаймоқранглилар” 29 ёшли испаниялик футболчининг маҳоратига юқори баҳо бермоқда ва уни жамоанинг таянч нуқтаси сифатида кўрмоқда. Бу ҳақда журналист Маттео Мореттога таяниб Championat нашри хабар берди.
“Шаҳарликлар” ушбу вазиятдан хабардор. Sky Sports нашрининг хабар беришича, “шаҳарликлар” Родрини жамоанинг энг муҳим фигураларидан бири деб билади ва у билан шартномани узайтириш ниятида. Бироқ, футболчининг тиззасидан олган жиддий жароҳати сабабли музокаралар бир оз секинлашган. Агар у жамоани тарк этиш ниятини билдирса, клуб раҳбарияти унинг трансферига тўсқинлик қилмоқчи эмас.
Аввалроқ футболчининг ўзи ҳам интервьюларининг бирида “қироллик клуби”га ўтиш имкониятини инкор этмаган эди. Шу боис унинг Мадрид жамоасига ўтиши эҳтимоли юқори баҳоланмоқда.
Маълумот учун, Родри 2019-йилдан буён “Манчестер Сити” шарафини ҳимоя қилиб келмоқда. Унинг клуб билан амалдаги шартномаси 2027-йилнинг ёзига қадар мўлжалланган. Transfermarkt портали футболчининг бозор қийматини 65 миллион еврога баҳоламоқда.
