Исроилнинг Эрон билан давом этаётган уруш шароитида баллистик ракеталарни тутиб олувчи қуроллари захираси тугаб бормоқда. Бу ҳақда америкалик манбаларга таяниб, Семафор нашри хабар берди.
АҚШ захиралар камайиб бораётганидан хабардор қилинган. Можаро бошланган вақтда ҳам тутиб олувчи ракеталар захираси чекланган эди. Чунки 2025 йилда бўлиб ўтган 12 кунлик Эрон–Исроил уруши вақтида у қисман сарфлаб юборилган. Эроннинг кассетали ўқ-дорилардан фойдаланаётгани Исроил ресурсларининг янада тезроқ камайишига сабаб бўлмоқда.
“Биз буни кутган эдик ва олдиндан кўра билган эдик”, дея таъкидлади америкалик амалдор.
Унинг сўзларига кўра, Қўшма Штатларда бундай тақчиллик кузатилмаяпти. Бироқ Вашингтон ўз захираларини Исроил билан бўлишиши ёки зарурат туғилса, уларни сотиши борасида ҳозирча аниқ маълумот йўқ.
“Биз минтақадаги базаларимиз, шахсий таркибимиз ва манфаатларимизни ҳимоя қилиш учун зарур бўлган ҳамма нарсага эгамиз”, дея таъкидлади америкалик амалдор.
Шунингдек, у Исроил ушбу етишмовчиликни “бартараф этиш чораларини ишлаб чиқаётганини” маълум қилди. Исроил расмийлари мудофаа учун қирувчи самолётлардан ҳам фойдаланиши мумкин. Бироқ узоқ масофали ракеталардан ҳимояланишда тутиб қолувчи ракеталар энг самарали восита ҳисобланади.
“Темир гумбаз” мудофаа тизими асосан қисқа масофали ҳужумларни қайтаришга мўлжалланган. Баллистик ракеталарга қарши эса бошқа мураккаброқ тизимлар қўлланилади.
АҚШнинг мудофаа тизимлари ва харажатлар
2025 йил июнь ойида АҚШ Эрон билан 12 кунлик урушда 150 дан ортиқ THAAD тутиб олувчи ракеталарини қўллади. Бу ўша пайтдаги АҚШ арсеналининг тахминан чорак қисмини ташкил этди.
2026 йилги урушнинг дастлабки беш кунида АҚШ тахминан 2,4 миллиард долларлик Патриот тутиб олувчи ракеталаридан фойдаланди. Январь ойида Пентагон THAAD ишлаб чиқаришни сезиларли даражада ошириш чораларини кўрди.
Оқ уй АҚШ захиралари президент Дональд Трампнинг Эронга нисбатан стратегик мақсадларига эришиш учун етарли эканини таъкидламоқда. Шунингдек, Эроннинг дрон ҳужумлари 95 фоизга, баллистик ракеталар зарбалари эса 90 фоизга камайганини даъво қилмоқда.
