FIFA президенти Жанни Инфантино АҚШ раҳбари Дональд Трамп билан учрашуви ва Эрон терма жамоаси ҳақида муҳим янгиликни эълон қилди.
Инфантинонинг сўзларига кўра, учрашув давомида бўлажак FIFA Жаҳон чемпионатига кўрилаётган тайёргарлик жараёни муҳокама қилинган.
“Бугун оқшом мен Америка Қўшма Штатлари президенти Дональд Трамп билан учрашдим. Унда бўлажак FIFA Жаҳон чемпионатига кўрилаётган тайёргарлик жараёнини ҳамда турнир бошланишига атиги 93 кун қолгани сабабли ортиб бораётган ҳаяжонни муҳокама қилдик”, дея ёзди Инфантино ўзининг инстаграм саҳифасида.
Унинг таъкидлашича, суҳбат давомида Эрондаги жорий вазият ҳам муҳокама қилинган. Шунингдек, Эрон терма жамоасининг 2026 йилги FIFA Жаҳон чемпионатига йўлланма олгани масаласи ҳам кўриб чиқилган:
“Президент Трамп Эрон жамоаси Қўшма Штатларда ўтадиган турнирда ҳеч қандай тўсиқсиз иштирок этиши мумкинлигини яна бир бор тасдиқлади. Ҳозир, ҳар қачонгидан ҳам кўра, барчамизга FIFA Жаҳон чемпионати каби одамларни бирлаштира оладиган воқеа керак. Америка Қўшма Штатлари Президентига кўрсатаётган қўллаб-қувватлаши учун самимий миннатдорчилик билдираман. Бу футбол дунёни бирлаштиришини яна бир бор исботлайди”.
Маълумот учун, 2026 йилги Жаҳон чемпионати 11 июндан 19 июлга қадар АҚШ, Канада ва Мексика давлатларида бўлиб ўтади. Эрон мусобақанинг “Г” гуруҳида Бельгия, Миср ва Янги Зеландия терма жамоалари жой олган.
Агар АҚШ ва Эрон ўз гуруҳларида иккинчи ўринни эгалласа, бу икки мамлакат 3 июль куни Далласда бўлиб ўтадиган плей-офф баҳсида ўзаро тўқнаш келиши мумкин.
Аввалроқ АҚШ президенти Дональд Трамп Эрон терма жамоасининг 2026 йилги футбол бўйича Жаҳон чемпионатида иштирок этиши уни қизиқтирмаслигини айтиб ўтган эди.
Эрон футбол федерацияси президенти Меҳди Тож эса бундай ҳолатда мамлакат Жаҳон чемпионатини умид билан кутмаслигини таъкидлаган.
28 февраль куни АҚШ ва Исроил Эронга қарши ҳарбий операция бошлади. Ҳужумлар Эроннинг энг йирик шаҳарларига, жумладан Теҳронга ҳам йўналтирилди. Оқ уй ушбу ҳужум сабабини Теҳрондан келаётган ракета ва ядровий таҳдидлар билан изоҳлади.
Эрон Ислом инқилоби қўриқчилари корпуси бунга жавобан Исроилдаги объектларга ҳужум қилиб, кенг кўламли жавоб операциясини бошлади. Эронга берилган зарбалар натижасида олий раҳбар Оятуллоҳ Али Хоманаий ҳалок бўлди.
