FIFA президенти Жанни Инфантино АҚШ билан давом этаётган урушга қарамай, Эрон терма жамоаси жорий ёзда бўлиб ўтадиган Жаҳон чемпионатида аниқ иштирок этишини маълум қилди.
28 февралда бошланган низо сабабли Эроннинг март ойида Осиёнинг энг кучли жамоаларидан бири сифатида қўлга киритган йўлланмасидан фойдалана олиши ва турнирга келиш истаги борлиги дарҳол шубҳа остига олинган эди.
Жаҳон чемпионатига АҚШ, Канада ва Мексика мезбонлик қилади, бироқ Эрон гуруҳ босқичидаги барча учта ўйинини АҚШ ҳудудида ўтказиши белгиланган. Март ойининг биринчи ярмида Эрон ҳукумати вакиллари жамоа ЖЧда қатнаша олмаслиги ҳақида турли фикрлар билдиришди ва FIFAга Эрон иштирокидаги ўйинларни Мексикага кўчиришни таклиф қилинди. Бироқ Мексика президенти Клаудия Шейнбаум ўтган ҳафтада FIFA ушбу сўровни рад этганини ва Жаҳон чемпионати режалаштирилганидек ўтишини таъкидлаганини тасдиқлади.
“Эрон жамоаси аниқ иштирок этади. Биз у вақтга қадар вазият тинч йўл билан ҳал бўлишига умид қиламиз. Улар ўз халқини ҳимоя қилади, улар саралашдан ўтган. Футболчилар ўйнашни хоҳлайди”, дейди Инфантино Вашингтонда ўтган CNBC нашрининг Invest in America форумида.
Эроннинг АҚШда ўз ўйинларини ўтказа олиши истиқболи ўтган ой охирида, Инфантино Туркиянинг Анталия шаҳридаги машғулот йиғинида жамоа билан кўришганидан сўнг яхшилангани айтилмоқда.
“Икки ҳафта олдин Анталиядаги йиғинда улар билан кўришдим. Улар ҳақиқатан ҳам ўйнашни хоҳлашади ва бу энг муҳими – спорт сиёсатдан холи бўлиши лозим. Тўғри, биз ойда эмас, Ер сайёрасида яшаяпмиз, лекин агар кўприклар қуришга ва уларни бутун сақлашга ишонадиган ҳеч ким қолмаган бўлса, буни биз қиламиз”, дея қўшимча қилди FIFA раҳбари.
Эрон делегацияси 11 июндан 19 июлга қадар давом этадиган турнир учун 10 июндан кечикмасдан Аризона штатидаги Туксон шаҳрига етиб келиши керак. Уларнинг биринчи ўйини 15 июнь куни “Калифорния” стадионида Янги Зеландияга қарши бўлиб ўтади. Шунингдек, 21 июнда Бельгия билан, 26 июнда эса Сиэтлда Мисрга қарши ўйинлар белгиланган. Агар Эрон плей-офф босқичига чиқса, бу учрашувлар ҳам катта эҳтимол билан АҚШда ўтказилади.
