Исроил президенти Исхак Герсок Эрон билан давом этаётган уруш қачон тугаши борасида аниқ муддатни айтишдан тийилди. У урушда “якуний натижага эришиш” муҳимлигини айтди. Бу ҳақда Герсокнинг Билд газетасига берган интервьюсига таяниб, Reuters хабар берди.
Президентнинг сўзларига кўра, АҚШ ва Исроилнинг Эронга ҳужумлари Яқин Шарқдаги вазиятни ўзгартирмоқда. У Эроннинг нефть объектларига берилган зарбаларни Теҳроннинг “уруш машинаси”ни таʻминловчи маблағларни қисқартириш усули сифатида оқлади.
Бироқ Вашингтон Исроилни Эрондаги нефть ва энергетика инфратузилмасига зарба бермасликка чақирмоқда. АҚШ позициясига кўра, бундай ҳужумлар тинч аҳолига зарар етказиши, глобал нефть нархининг кескин ошишига олиб келиши ва Форс кўрфази давлатларидаги объектларга нисбатан жавоб қайтарилишига сабаб бўлиши мумкин. Бундан ташқари, Трамп маъмурияти уруш якунлангач, Эрон билан нефть секторида ҳамкорлик қилиш имкониятларини ҳам кўриб чиқмоқда.
Исроил ташқи ишлар вазири Гидеон Саар аввалроқ мамлакати чексиз уруш олиб боришни режалаштирмаётгани ва уни қачон тўхтатиш масаласида Вашингтон билан маслаҳатлашаётганини айтганди.
“Минтақа ва бутун дунёда тартибсизлик ва террорни айнан эронликлар тарқатмоқда. Шу боис, назаримда, агар биз ҳамма нарсани шошилинч ўлчайдиган бўлсак, ҳеч қаерга ета олмаймиз. Чуқур нафас олиб, якуний натижага эришишимиз лозим”, деди Исроил президенти.
Ўз навбатида Трампнинг маслаҳатчилари уни Эрон билан урушдан чиқишга ундамоқда. Улар нефть нархининг ошиши ва можаронинг чўзилиши Трамп учун сиёсий йўқотишларга олиб келиши мумкинлигини айтган. АҚШ президентига уруш бўйича айрим жамоатчилик сўровлари натижалари ҳам тақдим этилган. Сўнгги кунларда эълон қилинган сўровлар америкаликларнинг аксарияти урушга қарши эканини кўрсатмоқда.
