Ўзбекистон кончилари Афғонистонда углеводород қазилмаларини қидириш ва геологик-қидирув ишлари амалга оширишни бошлади. Бу ҳақда 24 февраль куни Кон-геология вазирлиги матбуот хизмати хабар берди.
Маълум қилинишича, геологик-қидирув ишларини Uzbek Overseas Geology Company томонидан амалга оширилади. Жараён Муҳаммад-Жандагар, Шамар ва Аҳмадобод блокларида олиб борилиб, углеводород ресурслари, шунингдек темир ва мис конларини аниқлашга қаратилган.
Балх вилояти ҳокимининг иқтисодий масалалар бўйича ўринбосари Мавлавий Нурул Ходи Абу Идрис ҳамда компания бош директори Хайитбой Омонов иштирокида геологик-қидирув ишларига расман старт берилди. Компания афғон томони билан олиб борилган музокаралар якунида тегишли лицензияни қўлга киритди.
Мазкур лойиҳа Ўзбекистон Тоғ-кон саноати ва геология вазирлиги ҳамда Афғонистон Ислом Амирлигининг Тоғ-кон саноати ва нефть вазирлиги ўртасида илгари имзоланган ҳамкорлик келишуви доирасида амалга оширилмоқда. Ушбу келишув 2025-йилнинг августида Ўзбекистон Геология ва тоғ-кон саноати вазирлиги ҳамда Афғонистон Тоғ-кон саноати ва нефть вазирлиги ўртасида имзоланганди.
Келишув доирасида:
- Афғонистон ҳудудида жойлашган Муҳаммад-Жандагар, Шамар ва Аҳмадобод блокларида углеводород қазилмаларини қидириш ва геологик-қидирув ишлари амалга оширилади;
- қазиб чиқариш ҳуқуқи устувор равишда Ўзбекистон томони тузадиган операцион компанияга берилади;
- геофизик тадқиқотлар, ҳисоботлар ва техник-иқтисодий асослар тайёрлаш ишлари ўзбек мутахассисларига юклатилади;
- Афғонистон томони лойиҳаларга эксклюзив ҳуқуқ берилиши ва зарур рухсатларни тақдим этишни кафолатлайди;
Бу келишув икки йиллик эксклюзив муддатга эга бўлиб, кейинги босқичда халқаро тажрибалар асосида ҳамкорлик янада кенгайтирилади.
Uzbek Overseas Geology Company ҳақида
Корхоналар ва ташкилотларнинг ягона давлат регистри маълумотларига кўра, Uzbek Overseas Geology Company 2025 йил февраль ойида рўйхатга олинган. Устав капитали 12,97 миллиард сўм бўлган компания “бошқа тоифаларга кирмайдиган кончилик фаолияти” билан шуғулланади. Таъсисчилари “Ўзбек геология қидирув” ва “Ўзбекгеофизика” ҳисобланади (ҳар бири 50 фоиздан).
