Бухоронинг Шофиркон туманидаги мактабларда қурилиш ва таъмирлаш ишлари сифатсиз бажарилаётгани аниқланди. Бу ҳақда “Миллар” дастурида хабар қилинди.
Қайд этилишича, “Тезгузар” маҳалласи ҳудудида жойлашган 6-сонли умумтаълим мактабида 480 ўринли бинони капитал таъмирлаш ҳамда қўшимча 180 ўринли ўқув блоки қуриш ишлари жараёнида камчиликларга йўл қўйилган.
Қурилиш объектининг биринчи блок ғишт териш ишлари тасдиқланган лойиҳа талаблари асосида бажарилмаган. Хусусан, лойиҳада кўрсатилгандан анча кичик диаметрдаги армосеткалар қўлланилган, ғишт териш жараёнида вертикал чоклар қоришма билан тўлдирилмаган, объектнинг иккинчи блокида ташқи базалт ёпиштириш ишлари лойиҳа талабларига зид тарзда бажарилган.
Қурилиш сифатини аниқлаш мақсадида тумандаги 26-сонли мактабда ҳам текширув ўтказилган. Бу ерда 330 ўринли бинони реконструкция қилиш ҳамда қўшимча 240 ўринли ўқув биноси қуриш ишлари давомида биринчи блок ғишт териш ишлари тасдиқланган лойиҳа талабларига мувофиқ бажарилмаган.
Шу билан бирга, ғиштлар орасида вертикал чоклар қоришмаси билан тўлдирилмаган, биринчи блок пойдевор конструкцияси бўйича ёпиқ ишлар далолатномаси расмийлаштирилмасдан пойдеворни бетонлаштириш ишлари амалга оширилган.
Қурилиш иштирокчиларига аниқланган камчиликларни бартараф қилиш бўйича мажбурий бўлган ёзма кўрсатмалар берилди ҳамда пудратчилик ташкилотига маъмурий баённома расмийлаштирилди.
