Лондоннинг “Арсенал” клуби Англия Лига Кубоги ярим финалининг жавоб учрашувида ўз майдонида “Челси”ни 1:0 ҳисобида мағлуб этди ва финал йўлланмасини қўлга киритди.
Учрашувдаги ягона голга Кай Ҳаверц 90+7-дақиқада муаллифлик қилди. 14 январь куни бўлиб ўтган дастлабки баҳсда “Арсенал” сафарда 3:2 ҳисобида ғалаба қозонганди. Германиялик футболчи “Арсенал”га айнан “Челси” сафидан келиб қўшилган.
Финалда “Арсенал”га “Манчестер Сити” – “Ньюкасл” жуфтлиги ғолиби рақиблик қилади. Ушбу қарама-қаршиликдаги илк учрашувда “Манчестер Сити” сафарда 2:0 ҳисобида зафар қучган. Жавоб ўйини 5 февралга ўтар кечаси Манчестер шаҳрида бўлиб ўтади.
Маълумот учун, Англия Лига Кубоги 1960 йилдан буён ўтказиб келинади. Ўтган мавсумда турнир тарихида илк бор “Ньюкасл” ушбу совринни қўлга киритган. Энг кўп ғалаба “Ливерпуль” ҳиссасига тўғри келади — клуб кубокни 10 бор ютган. “Арсенал” мусобақада икки марта, “Челси” эса беш марта ғолиб бўлган.
“Арсенал” 2025/2026 йилги мавсумда тўртта мусобақада кураш олиб бормоқда. “Тўпчилар” АПЛда 1-ўринни эгаллаб турган бўлса, УЕФА Чемпионлар Лигасида 1/8 финал, Англия Кубогида эса 1/16 финал босқичига етиб келган. “Челси” эса янги бош мураббий Лиам Розенёр қўл остида ўтказилган 8 учрашувда иккинчи бор мағлубиятга учради.
