Opta статистик портали 25-турдан сўнг жамоаларнинг чемпионлик имкониятларини баҳолади. Асосий фаворит сифатида Лондоннинг “Арсенал” клуби кўрсатилди. “Канонирлар”нинг чемпионлик эҳтимоли 91,41 фоизга тенг деб баҳоланган.
Иккинчи ўринда 7,09 фоиз кўрсаткич билан “Манчестер Сити” жойлашган. Кучли учликни эса 1,36 фоиз натижа билан Бирмингемнинг “Астон Вилла” клуби якунлаб турибди.
Айни пайтда Англия Премьер Лигаси турнир жадвалида биринчи ўринни “Арсенал” эгаллаб турибди — 56 очко. Микель Артета шогирдлари иккинчи ўриндаги “Манчестер Сити”ни олти очкога ортда қолдирган.
Учинчи поғонада 47 очко билан “Астон Вилла” бормоқда. Тўртинчи ўринни эса 44 очкога эга “Манчестер Юнайтед” эгаллаб турибди.
Шунингдек, АПЛ турнир жадвалида кейинги ўринларда “Челси” (43 очко) ва “Ливерпуль” (39 очко) жойлашган.
Аввалроқ, Transfermarkt нашри энг қиммат таркибга эга клублар рўйхатини эълон қилган эди. Унга кўра, энг қиммат таркиб “Реал Мадрид” жамоасига тегишли бўлиб, “Қироллик клуби” футболчиларининг умумий қиймати 1,38 миллиард еврони ташкил этади. Кейинги ўринларда АПЛ етакчиси “Арсенал” (1,29 миллиард евро), шунингдек “Манчестер Сити” ва “ПСЖ” (1,19 миллиард евро) қайд этилган.
Маълумот учун, АПЛ номи остида (1992 йилдан буён) энг кўп чемпионликни “Манчестер Юнайтед” қўлга киритган — 13 марта. Кейинги ўринларда “Манчестер Сити” (8 марта), “Челси” (5 марта), “Арсенал” (3 марта), “Ливерпуль” (2 марта), “Блекберн” (1 марта) ва “Лестер” (1 марта) қайд этилган.
