Ўзбекистон ҳудудида 3 февраль куни соат 15:38 да зилзила содир бўлди. Бу ҳақда Сейсмопрогностик мониторинг маркази хабар берди.
Ер силкинишининг магнитудаси 3,7 ни ташкил этди, чуқурлиги эса 10 километр бўлди. Зилзила эписентри Бахмал тумани ҳудудида жойлашган.
Зилзила республиканинг бир қатор туманларида сезилди. Хусусан, Булунғур ва Бахмал туманларида зилзила кучи 2—3 балл атрофида бўлган. Тойлоқ, Ургут, Жомбой, Ғаллаорол туманларида эса 2 балли тебранишлар қайд этилган.
Маълумотларга кўра, зилзила эписентри Тошкент шаҳридан, тахминан, 230 километр жануби-ғарбда жойлашган. Айрим ҳудудларда ер силкинишлари 23 километрдан 48 километргача бўлган масофаларда сезилган.
Зилзила координаталари 39,62 даража шимолий кенглик ва 67,56 даража шарқий узунлик нуқтасига тўғри келади. Ҳозирча зилзила оқибатида талафотлар ёки жабрланганлар ҳақида расмий маълумот берилмади.
