Аргентинанинг “Росарио Централ” клуби ярим ҳимоячиси Анхел Ди Мария замонавий футболнинг икки юлдузи — Лионель Месси ва Криштиану Роналдунинг ўртасидаги фарқ ҳақида фикр билдирди.
“Профессионаллик нуқтайи назаридан Криштиану — биринчи рақам. Унинг меҳнатсеварлиги, доимий равишда юқори даражани сақлаб қолишда ёрдам беради. Месси билан рақобатда энг яхшиси бўлишга интилиши эса чинакам таҳсинга лойиқ. Аммо унинг фаолияти Месси даврига тўғри келгани мақсадга эришишни анча қийинлаштирди.
Роналду тинимсиз меҳнат қилиб биринчи рақам бўлишга интилган, бироқ Месси кийиниш хонасида мате (Жанубий Америкада машҳур бўлган ичимлик — таҳр) ичиб ўтирган пайтидаёқ Худо берган истеъдод билан энг яхшиси эканини исботлаган”, дейди Анхел Ди Мария.
Маълумот учун, Анхел Ди Мария 2010—2014-йиллар Роналду билан “Реал Мадрид”да тўп тепган. Месси билан эса Аргентина терма жамоасида бирга ўйнаган. Футболчи 2025-йилнинг январь ойидан бери “Росарио Сентал” клуби шарафини ҳимоя қилиб келади. У ҳозирга қадар ушбу жамоа сафида 56 та учрашувда иштирок этиб, 14 та гол ва 5 та ассист муаллифига айланган. Унинг клуб билан шартномаси 2026-йилнинг ёзига қадар амал қилади. Transfermarkt портали Ди Мариянинг қийматини 2 миллион еврога баҳолаган.
