Португалия терма жамоаси ҳамда Саудия Арабистонининг “Ан-Насср” клуби сардори Криштиану Роналду Аргентина терма жамоаси йирик турнирларда ғалаба қозонишга одатланганини, Португалия эса унинг давригача бундай муваффақиятларга эришмаганини айтди.
“Мессигача Аргентина неча марта жаҳон чемпиони бўлган? Улар учун бу одатий ҳол. Аргентина ҳам, Бразилия ҳам йирик мусобақаларда ғалаба қозонишга ўрганиб қолган. Агар Португалия Жаҳон чемпиони бўлса, бу ҳаммани ҳайратда қолдирган бўларди. Аргентина ғалаба қозонгани эса кўпчилик учун янгилик эмас.
Мен Португалия билан учта соврин ютдим. Бунгача мамлакат ҳеч қандай мусобақада ғалаба қозонмаган эди. Бу мени жуда бахтли қилади”, деди Роналду журналист Пирс Морган билан суҳбатда.
Эслатиб ўтамиз, 40 ёшли ҳужумчи Португалия терма жамоаси билан 2016-йилги Европа чемпионатида ғолиб чиққан, шунингдек, Миллатлар Лигасида икки марта — 2019 ва 2025-йилларда чемпионликни қўлга киритган.
Маълумот учун, Роналду жорий мавсум Саудия Пролигаси доирасидаги 10 та ўйинда майдонга тушиб, ўз ҳисобига 9 та гол ҳамда 2 та голли узатма ёздириб қўйган. Умуман олганда, ҳужумчи бутун карераси давомида 952 та гол муаллифига айланган. Португалиялик футболчи 1000 та гол уришни мақсад қилган.
Криштиану Роналду фаолияти давомида “Спортинг”, “Манчестер Юнайтед”, “Реал Мадрид” ҳамда “Ювентус” клублари шарафини ҳимоя қилган.
