Португалиялик футбол агенти Паулу Барбоза Криштиану Роналду ва Лионель Мессининг бир клубда тўп суриши мумкинлиги ҳақидаги гап-сўзларга ўз муносабатини билдирди.
Аввалроқ “Интер Майами” эгаси Девид Бекҳэм португалиялик юлдузнинг Саудия Арабистонидаги фаолиятини диққат билан кузатаётгани ва икки афсонани бир жамоага бирлаштиришни мақсад қилгани ҳақида хабарлар тарқалган эди. Бироқ агент бу воқеалар ривожига шубҳа билан қарамоқда.
“Роналду ўз ‘бойкотини’ аллақачон якунлади. Ҳозирча бу орзунинг амалга ошиши имконсиз. Албатта, бу гўзал манзара бўлар эди, лекин Роналду ва Мессининг ўзлари бир жамоада ўйнашни хоҳлашларига ишонмайман”, дея Барбозанинг сўзларини келтирмоқда Euro-Football нашри.
Эслатиб ўтамиз, Роналду Риёд клубининг трансфер сиёсатидан норози экани ва унинг ёзда жамоани тарк этиши мумкинлиги ҳақидаги миш-мишлар фонида АҚШ клуби португалиялик ҳужумчига қизиқиш билдиргани ҳақида хабар берилган эди. унга кўра, “Интер Майами” эгаси Девид Бекҳэм Роналдуни жамоага таклиф этиш вариантини жиддий кўриб чиқмоқда.
Маълумот учун, Роналду Саудия Пролигасининг жорий мавсумида 18 та ўйинда майдонга тушиб, 17 та гол уришга эришди. Унинг “Ан-Насср” билан шартномаси 2027 йилнинг ўрталарига қадар амал қилади.
