Колонияда жазони ўтаётган маҳкумдан пора талаб қилган шифокорлар қўлга тушди. Бу ҳақда Ички ишлар вазирлиги ҳузуридаги Жазони ижро этиш департаменти хабар қилди.
Қайд этилишича, маҳкумлар учун ихтисослашган касалхонада даволанаётган маҳкум ариза билан мурожаат қилиб, колониянинг тиббиёт бўлимида шифокор лавозимида ишлаб келаётган ходим ўз хизмат мавқейидан фойдаланиб, ундан мажбурий даволаш чораларини бекор қилиб бериш эвазига 7,5 минг доллар талаб қилганлигини билдирган.
Маҳкум колония шифокори Тошкент вилоятининг кўп тармоқли поликлиникасида жарроҳ бўлиб ишловчи таниши орқали ушбу пулларнинг 1,5 долларини укасидан олганини ҳам айтиб, пулнинг қолган қисмини талаб қилиб келаётган икки нафар шифокорга қонуний чора кўришни сўраган.
Ўтказилган тезкор тадбирда ушбу шахслар қўлга олинди ва Иқтисодий жиноятларга қарши курашиш департаменти Тошкент шаҳар бошқармаси томонидан жиноят иши қўзғатилган бўлиб, ҳозирда терговга қадар текширув ҳаракатлари олиб борилмоқда.
Пора эвазига ўз қасамёдини сотганлар
Андижонда маҳкумдан тамагирлик йўли орқали пул ундиришга уринган пробация хизмати инспектори ишдан олинган. У аёлга икки ойдан бери гўёки ўзининг ҳисобидан фирмага 800 минг сўм пул тўлаганини важ қилиб, 1 миллион 600 минг сўм талаб қилган.
Тошкент вилоятида эса ички ишлар ходими 10 минг доллар пора билан қўлга тушган. У ИИО сафидан бўшатилган қўриқлаш бошқармаси ходимини хизматга тиклаш учун пул сўраган.
Фарғонада кузатилган ҳолатда телефонларни ноқонуний ўтказиш учун пора олган божхона пости раҳбари 4 йилга қамалганди.
Бир неча бор чегарани ноқонуний кесиб ўтишга уринган шахсга мансабдорнинг ўзи таклиф билдириб, Қирғизистондан уяли алоқа телефонларини олиб ўца, катта фойда кўриши мумкинлигини ҳамда пул эвазига унга кўмаклашишини айтган.
Хоразмда эса вилоят ИИБ Тезкор қидирув хизматининг катта тезкор вакили Хива шаҳри ҳудудидан қишлоқ хўжалиги маҳсулотлари экиш учун ажратилган 12 сотих ер майдонида уй-жой қуриш учун ҳокимият идораларида ишловчи мансабдор танишлари орқали рухсат олиб бериш эвазига фуқародан 30 минг доллар олган вақтида ушланган.
