Мадриднинг “Реал” клуби президенти Флорентино Перес “Манчестер Сити” ҳужумчиси Эрлинг Ҳоландни жамоага таклиф қилмоқчи. Бу ҳақда Sky Sport Germany нашри хабар берди.
Манбага кўра, айни пайтда “қироллик клуби” қутқарувчи қидирмоқда. Ҳоланд эса уларнинг талабларига тўлиқ мос келади. Шу боис норвегиялик ҳужумчининг трансфери 2025/26-йилги мавсум якунида амалга ошиши мумкин. “Реал” раҳбарияти Ҳоланд яқинлари ва унинг агенти Рафаэла Пимента билан яхши алоқа ўрнатган бўлиб, бу трансферни амалга ошишида муҳим рол ўйнаши мумкин.
“Ҳоланд Испанияни яхши кўради. Унинг асосий мақсади — мадридликлар сафида ўйнаш. Бироқ келишувни амалга ошириш осон бўлмайди, чунки норвегиялик футболчининг “Манчестер Сити” билан шартномаси 2034-йилгача мўлжалланган”, дейилади манбада.
Эслатиб ўтамиз, Ҳоланд 2022-йилдан буён “Манчестер Сити” сафида тўп суриб келмоқда. Жорий мавсумда ҳужумчи жами 29 та учрашувда майдонга тушиб, ўз ҳисобига 26 та гол ва 4 та ассист ёздириб қўйган. Transfermarkt портали ҳужумчининг қийматини 200 миллион еврога баҳоламоқда.
