Европа ва жаҳон футболида навбатдаги ҳафта ҳам шов-шувли воқеалар ва кутилмаган трансфер миш-мишларига бой бўлди. Майдон ичидаги баҳслардан кўра, кўпроқ мураббийлар атрофидаги тахминлар ҳамда футболчилар иштирокидаги можаролар жамоатчилик диққат марказида турибди. Хусусан, Ўзбекистон терма жамоасининг Жаҳон чемпионати олдидан Европанинг топ жамоаларидан бири билан ўртоқлик учрашуви ўтказиши мумкинлиги, Дональд Трамп ва Жанни Инфантино ўртасидаги совуқчилик, “Реал” ҳамда “Барселона”нинг Ҳоланд учун рақобати, шунингдек, Винисиуснинг Мадрид клубига қўйган кескин шарти футбол оламида қизғин муҳокама қилинмоқда. “Дарё” нашри ҳафта давомида нуфузли манбалар эътиборида бўлган энг сара хабарларни бир жойга жамлади.
Ўзбекистон Европанинг номдор терма жамоасига қарши ўртоқлик учрашуви ўтказиши мумкин
Фабио Каннаваро бошчилигидаги Ўзбекистон миллий терма жамоаси 2026-йилги Жаҳон чемпионати стартидан аввал Европанинг номдор жамоаларидан бирига қарши ўртоқлик учрашуви ўтказиши кутилмоқда. Маълумотларга кўра, мазкур баҳсни июнь ойида ташкил этиш режалаштирилган.
Ҳозирча FIFA рейтингининг кучли ўнлигидан жой олган ушбу рақибга қарши ўйиннинг аниқ санаси ва манзили маълум эмас. Бироқ Ўзбекистон терма жамоасининг 1 июнь куни Канадада мезбонлар билан ўртоқлик учрашуви ўтказиши инобатга олинса, УЕФА вакили билан бўладиган ўйин ҳам Шимолий Америка қитъасида бўлиб ўтиши эҳтимоли юқори. Мазкур учрашув Каннаваро шогирдлари учун тарихий мундиал олдидан асосий тайёргарлик босқичи бўлиб хизмат қилиши кутилмоқда.
Трамп ва Инфантино: дўстлик дарз кетдими?
АҚШ президенти Дональд Трампнинг сўнгги баёноти FIFA раҳбари Жанни Инфантинони қийин аҳволга солиб қўйди. Эрон спорт вазири АҚШнинг ҳарбий операциялари туфайли терма жамоа Жаҳон чемпионатига бора олмаслигини айтганидан сўнг, Трамп Эроннинг мундиалда қатнашиши “маъқул эмаслиги”ни таъкидлади.
Мавжуд маълумотларга кўра, Инфантино бу вазиятда Трампнинг ҳаракатларини ўзига нисбатан хиёнат сифатида баҳоламоқда. Сабаби, Инфантино сўнгги вақтларда Трамп билан яқин муносабатда бўлиб келган ва ҳатто унга FIFA Тинчлик мукофотини топширган эди. Бироқ эндиликда АҚШ президенти мусобақага ким келиши борасидаги масалаларни FIFA билан маслаҳатлашмасдан, мустақил ҳал қилишга уринмоқда. Ташкилот раҳбари эса Трампнинг бу позициясини кутилмаган зарба деб ҳисобламоқда.
Юрген Клопп: “Реал” ёки Германия терма жамоаси?
Ҳозирда “Red Bull” тизимида фаолият юритаётган Юрген Клопп яна мураббийлик ишига қайтиши мумкинлиги ҳақида хабарлар тарқалмоқда. Маълум қилинишича, Мадриднинг “Реал” клуби президенти Флорентино Перес Альваро Арбелоа ўрнига айнан германиялик мутахассисни олиб келиш вариантини кўриб чиқмоқда. Сабаби Перес жамоани бошқариш учун тажрибали ва номдор мураббий керак деб ҳисобламоқда.
Шу билан бирга, Клоппга Германия терма жамоаси ҳам асосий номзод сифатида қарамоқда. Агар амалдаги бош мураббий Юлиан Нагелсманн бошчилигидаги жамоа Жаҳон чемпионатида кутилган натижани қайд эта олмаса, унинг ўрнини айнан Клопп эгаллаши кутилмоқда. Ҳозирча мураббийнинг ўзи қайси лойиҳани танлаши борасида аниқ маълумотлар йўқ, бироқ унинг фаолиятини давом эттириши учун камида иккита жиддий таклиф мавжуд.
“Реал” ва “Барселона” Ҳоландга жиддий қизиқиш билдирди
“Манчестер Сити” ҳужумчиси Эрлинг Ҳоланд Англия Премьер Лигасидан Испания Ла Лигасига кўчиб ўтиши мумкин. Маълум бўлишича, Мадриднинг “Реал” клуби президенти Флорентино Перес жамоанинг ҳужум чизиғини янада кучайтириш мақсадида норвегиялик форвардни сотиб олиш имкониятини кўриб чиқмоқда. Режага кўра, Килиан Мбаппе ва Эрлинг Ҳоланд тандеми жамоанинг ҳужумдаги имкониятларини янада оширади.
“Барселона”да ҳам Эрлинг Ҳоланд атрофидаги муҳокамалар узоқ вақт давом этди. Клуб президентлиги учун ўтказилган сайловда асосий номзодлардан бири сифатида қатнашган Виктор Фонт ўзининг сайловолди дастурида Ҳоланд трансферини асосий ваъда сифатида кўрсатган эди. Ҳатто Фонтнинг вакиллари футболчининг агентлари билан дастлабки алоқаларни ўрнатишга ҳаракат қилгани ҳақида ҳам хабарлар тарқатди. Шу йўл билан Виктор Фонт амалдаги президент Жоан Лапортани ортда қолдиришни режалаштирган эди. Бироқ сайлов якунларига кўра, Жоан Лапорта яна бир бор клуб президенти этиб сайланди.
Бироқ футболчининг ўзи шошилаётгани йўқ. Маълумотларга кўра, Ҳоланд “Манчестер Сити”да қолишни мақсад қилган. Ҳужумчи келажакда ўзини Ла Лигада синаб кўришни истаса-да, ҳозирда Англия Премьер Лигасидан кетмоқчи эмас.
Хаби Алонсо “Ливерпуль”га қайтишга яқин
“Ливерпуль” клубида мураббий алмашинуви юз бериши ҳақида хабарлар тарқалмоқда. Маълум қилинишича, жамоанинг амалдаги бош мураббийи Арне Слот ўз лавозимини тарк этиши мумкин. Бунга асосий сабаб сифатида жамоанинг Чемпионлар Лигасидаги натижаси кўрилмоқда: агар мердисайдликлар ушбу турнирда ғолиб чиқмаса, нидерландиялик мутахассис истеъфога чиқарилиши мумкин.
“Ливерпуль” раҳбарияти Арне Слотнинг ўрнига энг муносиб номзод сифатида жамоанинг собиқ футболчиси Хаби Алонсони кўрмоқда. Эслатиб ўтамиз, испаниялик мутахассис шу йилнинг январь ойида Мадриднинг “Реал” клубидаги бош мураббийлик лавозимидан озод этилган эди.
Хабарларга кўра, “Ливерпуль” мутасаддилари аллақачон Алонсо билан музокараларни бошлаб юборган. Айрим манбаларнинг таъкидлашича, томонлар ўртасида келгуси ҳамкорлик бўйича оғзаки келишувга ҳам эришилган. Агар жамоанинг жорий мавсумдаги натижалари раҳбариятни қониқтирмаса, ёзги танаффус вақтида айнан Хаби Алонсо мердисайдликлар бошқарувини қўлга олиши кутилмоқда.
Винисиуснинг “Реал”га шарти: “Родри келса, мен кетаман”
Мадриднинг “Реал” клуби ва Винисиус Жуниор ўртасида янги шартнома бўйича музокаралар кутилганидан қийин кечмоқда. Амалдаги келишув якунланишига 15 ойдан кўпроқ вақт қолган бўлса-да, томонлар ҳали бир қарорга келишгани йўқ. Бразилиялик ҳужумчи нафақат маошини сезиларли даражада оширишни, балки клубнинг трансфер сиёсатига оид шартларини ҳам илгари сурмоқда.
Инсайдерларнинг хабар беришича, Винисиус агар Мадрид клуби “Манчестер Сити” ярим ҳимоячиси Родрини сотиб олса, жамоани тарк этишини билдирган. Маълумки, 2024-йилда “Олтин тўп” айнан испаниялик футболчига берилгани ва ўшанда “Реал” тақдирлаш маросимини бойкот қилгани Винисиус учун ҳамон оғриқли мавзу бўлиб қолмоқда. У ўзининг асосий рақобатчиси билан битта жамоада ўйнашни истамаяпти.
Бунинг ўрнига, Винисиус клуб раҳбариятига “Ливерпуль” ярим ҳимоячиси Доминик Собослаини сотиб олишни тавсия қилган. Бразилиялик футболчи венгриялик ўйинчи билан яхши муносабатда эканлиги ва унинг келиши жамоани янада кучайтиришини айтилмоқда. Ҳозирча “Реал” раҳбарияти футболчининг бу талабларига қандай муносабат билдириши номаълум.
