Англия матбуотида Эрлинг Ҳоланднинг Мадриднинг “Реал” клубига ўтиши мумкинлиги ҳақидаги хабарлар тарқалмоқда. El Nacional нашрининг ёзишича, “Манчестер Сити” бош мураббийи Пеп Гвардиола ушбу вазиятга муносабат билдирган.
Мутахассис ҳужумчидан трансфер борасидаги музокаралар ва миш-мишларга чалғимасликни, бор эътиборини мавсумнинг ҳал қилувчи қисмига қаратишни сўраган. “Манчестер Сити” раҳбарияти футболчининг спорт формасидан эмас, балки бундай хабарлар унинг руҳий ҳолатига салбий таъсир кўрсатиши ва жамоадаги умумий муҳитни бузиши мумкинлигидан хавотирда. Гвардиоланинг фикрича, жамоанинг барча турнирларда ғалаба қозониши нафақат Ҳоланднинг жисмоний, балки руҳан тайёрлигига ҳам боғлиқ.
“Реал”нинг норвегиялик футболчига бўлган қизиқиши узоқ вақтдан бери маълум. Мадрид клуби ҳужум чизиғини кучайтириш учун Ҳоланд номзодини асосий вариант сифатида кўрмоқда. Гарчи трансфер молиявий жиҳатдан мураккаб бўлса-да, футболчининг хоҳиши ҳал қилувчи аҳамиятга эга бўлиши мумкин.
Хабарларга кўра, Гвардиола Ҳоланд билан суҳбатда “Реал” билан ҳар қандай мулоқотни камида мавсум тугагунга қадар тўхтатиб туришни тавсия қилган. Мавсум якунлангач, футболчи ўз келажаги борасида мустақил қарор қабул қилишда эркин бўлади.
Маълумот учун, Transfermarkt портали 25 ёшли Эрлинг Ҳоландни 200 миллион еврога баҳолаган. Унинг “Манчестер Сити” билан шартномаси 2034-йилнинг ёзига қадар амал қилади.
