Эрон ҳаво ҳудуди ёпилгани сабабли 15 январь куни Ўзбекистондан учган ва Ўзбекистонга учаётган бир қатор авиарейслар жўнаш аэропортларига қайтишга мажбур бўлди.
Uzbekistan Airports матбуот хизматининг хабар қилишича, қуйидаги рейслар жўнаш аэропортларига қайтишга мажбур бўлган:
- Fly Оnе Аsia’нинг 7Q7742 рейси (Мадина—Тошкент йўналиши), 7Q4442 рейси (Мадина—Фарғона йўналиши) Мадина аэропортига;
- Jazeera Airways’нинг J9650 рейси (Тошкент—Кувайт) Тошкент аэропортига;
- Sam Air’нинг 9S3303 рейси (Самарқанд—Жидда), Самарқанд аэропортига;
- Fly Khiva’нинг 2U7911 рейси (Урганч—Мадина йўналиши) Урганч аэропортига;
- Uzbekistan Аirways’нинг HY336 рейси (Жидда—Тошкент) Жидда аэропортига.
Эрон ўз ҳаво ҳудудини махсус рухсат этилган парвозлардан ташқари барча рейслар учун ёпган. Ушбу давлатда 2025 йил декабрь ойи охиридан бери норозилик намойишлари давом этмоқда. ТИВ Эронда бўлиб турган Ўзбекистон фуқароларидан митинг ва намойишларда иштирок этмасликни, одамлар кўп тўпланадиган жойлардан йироқ бўлишни ҳамда шахсий хавфсизлик чораларига қатъий риоя этишни сўради.
