Саудия Арабистонининг “Ал Ҳилол” клуби “Манчестер Юнайтед” ярим ҳимоячиси Бруно Фернандешни ўз сафига қўшиб олиши мумкин. Бу ҳақда X (собиқ Twitter) тармоғидаги Indykaila News нашри хабар берди.
Манбага кўра, саудияликлар португалиялик футболчи трансфери учун манкунианларга 100 миллион фунт стерлинг (115 миллион евро) таклиф қилишга тайёр. Агар келишув амалга ошса, Фернандешнинг маоши ҳафтасига 600 минг фунт (йилига 28,8 миллион фунт)ни ташкил этади. Эҳтимолий трансфер январь ойида амалга ошиши мумкин.
Риёд клуби ёзги трансфер ойнаси вақтида ҳам португалиялик футболчига қизиқиш билдирганди. Аммо Фернандеш “Манчестер Юнайтед” раҳбарияти билан гаплашиб, клубда қолмоқчи эканлигини маълум қилган. Шу боис трансфер амалга ошмаган. Аммо ҳозирги пайтда вазият ўзгарган. Чунки яқинда клуб португалиялик мутахассис Рубен Аморимни ишдан бўшатди. Мазкур ҳолат Брунонинг ҳам келажагига таъсир қилши мумкин.
Маълумот учун, жорий мавсум Бруно Фернандеш “Манчестер Юнайтед” сафида жами 19 та учрашувда майдонга тушиб, бешта гол ва саккизта голли узатма муаллифига айланган. Футболчининг “қизил иблислар” билан амалдаги шартномаси 2027 йил ёзигача мўлжалланган. Transfermarkt портали унинг бозор қийматини 40 миллион еврога баҳоламоқда.
