Украина президенти Владимир Зеленский АҚШ Венесуэла етакчиси Николас Мадурони қўлга олгани каби Чеченистон раҳбари Рамзан Қодировга нисбатан ҳам худди шундай ҳарбий операция ўтказишга чақирди. Бу ҳақда “Украинсакая правда” хабар берди.
Қодировга нисбатан Мадуро сценарийси
Украина етакчисининг фикрича, Америка махсус хизматларининг бундай ҳаракати Россия президенти Владимир Путинни урушни тугатиш бўйича тинчлик шартномасига рози бўлишга мажбур қиладиган аргумент бўлиши мумкин.
“Биз яхши натижаларга эришдик, лекин ҳали ҳамма нарсани охирига етказганимиз йўқ. АҚШ қандай босим ўтказишни билади. Масалан, Мадуро. Операцияни тез амалга оширишдими? Ҳа тезда бажарилди. Буни бутун дунё кўрди. Келинг, худди шуни, масалан, Қодиров билан ҳам қилайлик. Балки шунда Путин ўйлаб кўрар”, деди Зеленский.
Медведевнинг Гермная канцлери ҳақидаги гаплари
Россия Хавфсизлик кенгаши раиси ўринбосари Дмитрий Медведев олдинроқ Венесуэладаги воқеалардан сўнг бошқа давлатлар етакчилари, жумладан, Германия канцлери Фридрих Мерсга нисбатан ҳам шундай қўлга олиш операциялари ўтказилиши мумкинлигини айтганди.
“Ўша неонасист Мерснинг ўғирлаб кетилиши бу карнавал сериясидаги ажойиб сюжет бурилиши бўлиши мумкин эди. Ҳайрон қоладиган нарсанинг ўзи қолмади. Ушбу сценарийда ҳам ҳақиқат учқунлари бор. Унинг Германиянинг ўзида ҳам таъқиб қилиниши учун асослар етарли. Шунинг учун бу уятли иш бўлмасди. Айниқса, фуқаролар унинг дастидан бекорга азоб чекаётган бир пайтда”, деган Медведев «ТАСС» агентлигига.
Маълумот ўрнида, 63 ёшли Николас Мадуро ва унинг рафиқаси Силия Флорес 3 январь куни Венесуэла пойтахти Каракасда АҚШ кучлари томонидан қўлга олинган. Улар шундан сўнг АҚШ Гиёҳвандликка қарши кураш бошқармасининг Нью Йоркдаги штаб-квартирасига етказилган. Мадуро қўлга олинганидан кейин вице-президент Делси Родригес президент вазифасини бажарувчи этиб расман тайинланди. Бироқ Дональд Трамп мамлакатни ҳозирча АҚШ бошқаришини таъкидлаган.
