Россия Украинага қарши урушни фақат Хитойнинг қўллаб-қувватлаши туфайли давом эттириш имкониятига эга. Бу ҳақда Украина президенти офиси раҳбари маслаҳатчиси Михаил Подоляк маълум қилди.
Подолякнинг сўзларига кўра, Пекин ўз сиёсий таъсирини кучайтириш учун Москвадан фойдаланмоқда.
“Бу аянчли оқибатларга олиб келади, афсуски, дунё беқарорлашади. У аллақачон тартибсизлашган, беқарорлашган ва Россия бунга катта ҳисса қўшишни давом эттирмоқда. Биргина Хитой ресурслари ҳисобига Россия буни амалга оширмоқда”, деди президент офиси маслаҳатчиси.
Унинг фикрича, Хитойга нисбатан пухта ўйланган сиёсат юритиш лозим. Агар Пекин вазиятни кескинлаштиришни тўхтатишга тайёр бўлмаса, у ҳолда Украина унга қарши “қатъий, максимал даражада чекловчи санкциялар” жорий этиши мумкин.
Хитой Россияга дронлар ишлаб чиқиш учун компонентлар экспортини оширди
Хитой ёз ойларида оптик толали дронларни ишлаб чиқариш учун зарур бўлган асосий компонентлар экспортини кескин ошириб, Россияга сезиларли ёрдам кўрсатди. Бу ҳақда статистик маʻлумотларга таяниб, Washington Post хабар берганди.
Маълум қилинишича, бу ёрдам Украина мудофаасини фронт чизиғида бостиришга имкон берган. Гап оптик толали кабеллар ва литий-ион батареялар экспорти ҳақида кетмоқда. Россия ва Хитой ишлаб чиқарувчилари ўртасидаги яқин ҳамкорлик Москвага урушда муҳим устунлик бермоқда.
Июль-август ойларида Хитойнинг Россияга оптик толали кабел етказиб бериш ҳажми деярли 10 баравар ошган, май ойида бу кўрсаткич рекорд даражага, кейин эса июнь ойида яна ўсган. Ёз давомида литий-ионли батареялар экспорти ҳам кескин ошган. Июнь ойида 54 миллион долларлик, августда эса 47 миллион долларлик батареялар Россияга жўнатилган. Пекин урушда бетараф эканини таъкидламоқда. Жаҳон тижорат дронлари бозорининг 80 фоизини эгаллаб турган Хитой ишлаб чиқарувчилари эса тайёр дронларни Россияга тўғридан тўғри экспорт қилишни қисқартирган.
