АҚШнинг Венесуэлага қарши операцияси чоғида Кубанинг 32 нафар фуқароси ҳалок бўлди. Ҳолат юзасидан Гавана 5 ва 6 январь кунлари қурбонлар хотирасига икки кунлик мотам эълон қилди. Бу ҳақда Reuters хабар берди.
Қурбонлар Николас Мадуро ҳокимият тепасига келганидан буён унинг хавфсизлигини таъминлаб келган ҳарбийлар ва махсус хизмат ходимлари бўлган. Улар жанговар тўқнашувлар ва ҳаво ҳужумлари оқибатида жон берган.
“Хавфсизлик ва мудофаа борасидаги ўз мажбуриятларига содиқ қолган ватандошларимиз ўз вазифаларини муносиб ва қаҳрамонларча адо этди. Улар шиддатли қаршиликдан сўнг тўғридан тўғри жангларда ёки объектларга қилинган ҳаво ҳужумларида ҳалок бўлди”, дейилади хабарда.
Куба Мадуро ҳокимиятга келганидан буён унинг хавфсизлигини қисман таъминлаб келган. Венесуэла президенти қўлга олинган пайтда қанча кубалик уни қўриқлаётгани, шунингдек, яна қанчаси бошқа жойларда ҳалок бўлгани ҳозирча аниқ эмас.
63 ёшли Мадуро ва унинг рафиқаси Силия Флорес 3 январь куни Венесуэла пойтахти Каракасда АҚШ кучлари томонидан қўлга олиниб, АҚШга олиб кетилди. Улар АҚШ Гиёҳвандликка қарши кураш бошқармасининг Нью Йоркдаги штаб-квартирасига етказилди. Мадуро қўлга олинганидан сўнг вице-президент Делси Родригес президент вазифасини бажарувчи этиб расман тайинланди. Бироқ Дональд Трамп мамлакатни ҳозирча АҚШ бошқаришини таъкидлади.
Мадуро ва унинг рафиқасига “наркотерроризм”, қурол сақлаш ва гиёҳванд моддалар контрабандаси бўйича айбловлар қўйилган. Улар АҚШда суд қилинади. Венесуэла президенти унга қарши қаратилган айбловларни бир неча бор рад этган.
