Мадриднинг “Реал” клуби ҳужумчиси Килиан Мбаппе Испания Суперкубоги ярим финали доирасида “Атлетико”га қарши ўйинда иштирок этмаслиги мумкин. Учрашув 8 январь куни Саудия Арабистонининг Жидда шаҳрида бўлиб ўтади.
Маълумот учун, франциялик футболчининг чап тизза боғламлари чўзилгани аниқланган. Бироқ тиббий текширувлардан сўнг унинг жароҳати дастлаб кутилганидек жиддий эмаслиги маълум бўлди. El Chiringuito телеканали хабарига кўра, Мбаппе жамоа билан бирга Суперкубок баҳсида иштирок этиш учун Саудия Арабистонига йўл олиши кутилмоқда, бироқ унинг ярим финалда майдонга тушиш эҳтимоли жуда паст.
Испания Суперкубогининг иккинчи ярим финал баҳсида “Барселона” ва Бильбаонинг “Атлетик” жамоалари ўзаро тўқнаш келади. Турнир финали 11 январь куни бўлиб ўтади.
Маълумот учун, Килиан Мбаппе 2024 йил ёзидан буён “қироллик клуби” сафида тўп суриб келмоқда. Шу вақтга қадар у Мадрид жамоаси сафида 83 та учрашувда майдонга тушиб, 73 та гол ва 10 та голли узатма муаллифига айланган. Унинг “Реал” билан амалдаги шартномаси 2029 йил июнига қадар мўлжалланган. Transfermarkt нашри футболчининг бозор қийматини 180 миллион еврога баҳолаган.
“Реал Мадрид” навбатдаги учрашувини бугун, 4 январь куни Испания Ла Лигаси 18-тури доирасида “Бетис”га қарши ўтказади. Ушбу баҳс Тошкент вақти билан соат 20:15 да “Сантиаго Бернабеу” стадионида старт олади.
Мадрид клуби Ла Лигада 18 та учрашув ўтказиб, 42 очко жамғарган ҳолда турнир жадвалида иккинчи ўринни эгаллаб турибди. Чемпионат етакчиси “Барселона” эса 18 ўйиндан сўнг 46 очкога эга.
Эслатиб ўтамиз, 2026 йил январь ойида Саудия Арабистонида Испания Суперкубоги мусобақаси ўтказилиши сабабли, Ла Лига 19-туридан ўрин олган “Реал Мадрид” — “Атлетик Бильбао” ҳамда “Барселона” — “Атлетико Мадрид” учрашувлари аввалроқ ўтказилган.
