Мадриднинг “Реал” клуби ҳужумчиси Килиан Мбаппе Испания Суперкубоги ярим финалидан ўрин олган “Атлетико”га қарши ўйинда майдонга туша олмайди. Бу ҳақда The Athletic нашри хабар берди.
Аввалроқ Мбаппе жамоа билан бирга учрашувга бориши айтилганди, бироқ унинг жароҳати сабаб ўйинда қатнашиши сўроқ остида эди. Эндиликда эса франциялик футболчи “Атлетико”га қарши баҳсни ўтказиб юбориши аниқ бўлди. Мазкур беллашув 8 январь куни Саудия Арабистонининг Жидда шаҳрида бўлиб ўтади.
Суперкубокнинг иккинчи ярим финалида “Барселона” ва Бильбаонинг “Атлетик” жамоалари ўзаро тўқнаш келади. Турнирнинг финал учрашуви 11 январь куни бўлиб ўтади.
Маълумот учун, франциялик футболчи Испания Ла Лигаси 17-туридан ўрин олган “Севилья”га қарши баҳсда жароҳат олган эди. Дастлаб Килианнинг чап тизза боғламлари чўзилгани аниқланган. Бироқ тиббий текширувлардан сўнг унинг жароҳати кутилганидек жиддий эмаслиги маълум бўлди.
Мбаппе 2024 йил ёзидан бери “Реал” сафида тўп сурмоқда. У шу вақтга қадар мадридликлар таркибида 83 та ўйинда иштирок этиб, 73 та гол ва 10 та голли узатма амалга оширган. Футболчининг клуб билан шартномаси 2029 йил июнигача амал қилади.
