Бугун, 3 январь куни тунда Венесуэла пойтахти Каракас шаҳридаги ҳарбий ва фуқаровий объектларга ҳаво ҳужуми амалга оширилди. Ҳукумат АҚШни мамлакатга ҳужум қилганликда айблаб, фавқулодда ҳолат жорий этди, дея хабар берди Associated Press.
Манбага кўра, пойтахтда камида етти портлаш содир этилган. Ҳозирча Оқ уй ва Пентагон ҳолат юзасидан расман баёнот бергани йўқ.
Портлаш оқибатида Каракасдаги ҳарбий базадан тутун кўтарилгани, яна бир ҳарбий иншоот электрсиз қолгани хабар қилинган. Венесуэла президенти Николас Мадуро барча миллий мудофаа режаларини амалга оширишни буюрган ва мамлакатда фавқулодда ҳолат эълон қилган. Ҳукумат ўз тарафдорларини кўчаларга чиқишга чақирган.
“Бутун ер ларзага келди. Бу даҳшатли. Биз портлашлар ва самолётлар овозини эшитдик”, деган портлаш гувоҳларидан бири, 21 ёшли офис ходими Кармен Ҳидалго.
Аввалроқ 2025 йил декабрда Қўшма Штатлар Венесуэла соҳилидаги порт иншоотига дрон орқали ҳужум уюштиргани хабар қилинганди. Бу АҚШнинг Венесуэла ичидаги нишонга илк зарба бериши бўлган. Дрон ҳужуми орқали мамлакат соҳилидаги чекка кема тўхташ жойи нишонга олинган. АҚШ ҳукуматининг билдиришича, ушбу объектдан Венесуэланинг Трен де Арагуа жиноий гуруҳи гиёҳванд моддаларни сақлаш ва уларни кейинчалик кемаларга юклаб жўнатиш учун фойдаланган. Ушбу зарба АҚШ ва Венесуэла президенти Николас Мадуро ўртасидаги кескинликни сезиларли даражада оширган. Бунгача АҚШ Кариб денгизи ва Тинч океанининг шарқий қисмида гиёҳванд моддалар ташишда гумонланган 30 дан ортиқ кемани йўқ қилган эди. Аммо бу зарбалар халқаро сувларда амалга оширилган. Венесуэла ҳудуди ичида ҳужум уюштириш эса — янги босқичдир.
Оқ уй маъмурияти ушбу кампанияни гиёҳвандликка қарши кураш билан изоҳламоқда. Бироқ Трампнинг аппарат раҳбари Сюзи Уайлс интервьюларидан бирида кема зарбаларидан мақсад Мадурони таслим бўлишга мажбурлаш эканини шама қилган. АҚШ мудофаа вазири Пит Хегсет наркобаронларни террорчиларга қиёслаган.
