Венесуэла ҳукумати мамлакат президенти Николас Мадуронинг қаерда экани ҳақида маълумотга эга эмас ва АҚШдан унинг тириклигини кўрсатишни талаб қилмоқда. Бу ҳақда мамлакат ижрочи вице-президенти Делси Родригес Telesur телеканали эфирида маълум қилди.
Вице-президент мамлакат пойтахти ҳамда Арагуа, Миранда ва Ла-Гуайра штатларига қарши тинч аҳолининг қурбон бўлишига олиб келган ҳарбий ҳужумни қаттиқ қоралаган. Шунингдек, Қўшма Штатлардан президент Николас Мадуро ва биринчи хоним Силия Флореснинг тирик эканини тасдиқлашни талаб қилган.
Родригеснинг таъкидлашича, президент Мадуро бундан аввал халқни мамлакатнинг турли ҳудудларидаги тинч аҳолига таъсир кўрсатиши мумкин бўлган бундай ҳужум ҳақида огоҳлантирган. Бунга жавобан, президентнинг кўрсатмасига кўра, мамлакат мудофаа тизимлари жанговар шайлик ҳолатига келтирилган.“Биз президент Николас Мадуро ва биринчи хоним Силия Флореснинг қаердалигини билмаймиз. Дональд Трамп ҳукуматидан президент Мадуро ва биринчи хоним ҳаёт эканликларини дарҳол тасдиқлашни талаб қиламиз”, деди у ўз баёнотида.
3 январь куни тунда Венесуэла пойтахти Каракас шаҳридаги ҳарбий ва фуқаровий объектларга ҳаво ҳужуми амалга оширилди. Ҳукумат АҚШни мамлакатга ҳужум қилганликда айблаб, фавқулодда ҳолат жорий этди. Пойтахтда камида еттита портлаш содир этилган. Портлаш оқибатида Каракасдаги ҳарбий базадан тутун кўтарилгани, яна бир ҳарбий иншоот электрсиз қолган.
Бундан аввал АҚШ президенти Дональд Трамп Венесуэла президенти Николас Мадуро қўлга олиниб, мамлакатдан олиб чиқиб кетилганини маълум қилган.
