Эрон Ислом инқилоби қўриқчилари корпуси АҚШнинг минтақадаги технологик компаниялари объектларини нишонга олиш билан таҳдид қилди. Бу ҳақда Tasnim хабар берди.
Яқин Шарқдаги компаниялар орасида Microsoft, Apple ва Google ҳам бор. Ислом инқилоби қўриқчилари корпуси бу компанияларни Эронга қарши “террор операцияларида” иштирок этишда айбламоқда. Рўйхатдан 18 та компания ўрин олган.
Улар орасида йирик технологик корпорациялар, электроника ҳамда чип ишлаб чиқарувчилар — Cisco, HP, Intel, Oracle, Microsoft, Apple, Google, Меtа, IBM, Dell, Nvidia бор. Шунингдек, аналитик дастур ишлаб чиқувчи Palantir Technologies, JPMorgan Chase молиявий гуруҳи, саноат ва аэрокосмик компаниялар — General Electric ва Boeing ҳам киритилган. Бундан ташқари, Tesla, БААнинг G42 сунъий интеллект гуруҳи ва Spire Solutions тилга олинган.
Баёнотда айтилишича, ушбу компаниялар Эронга зарбаларни режалаштириш ва нишонга олиш жараёнида иштирок этган. Ислом инқилоби қўриқчилари корпуси компания ходимларига зудлик билан иш жойларини тарк этишни, яқин ҳудудда яшовчиларга эса объектлардан камида бир километр узоқлашишни тавсия қилган. Бироқ зарба берилиши мумкин бўлган аниқ жойлар очиқланмаган.
Баёнотда айтилишича, таҳдидлар 1 апрель куни Теҳрон вақти билан соат 20:00 дан (Тошкент вақти билан 21:30) кучга киради. Март ойи ўрталарида Эроннинг марказий ҳарбий қўмондонлиги АҚШ ва Исроил билан боғлиқ Яқин Шарқдаги объектлар ҳамда банк инфратузилмасига зарбалар берилиши мумкинлигини эълон қилганди. Огоҳлантириш Эрон банкларидан бирига уюштирилган ҳужум ортидан янграган.
