АҚШ президенти Дональд Трамп Венесуэла ҳукуматини Америка энергетика компанияларининг ҳуқуқларини “ноқонуний” равишда ўзлаштириб олишда айблади. Бу ҳақда давлат раҳбари Эндрюс авиабазасига 17 декабрь кунидаги ташрифи чоғида, журналистларга берган интервьюсида маълум қилди.
“Бизга тегишли бўлган ҳамма нарса тортиб олинди”
Трампнинг сўзларига кўра, Каракас маъмурияти АҚШнинг энергетика соҳасидаги манфаатларига жиддий зарар етказган ва Америка компанияларини мамлакатдан сиқиб чиқарган.
“Улар бизнинг барча энергетика ҳуқуқларимизни тортиб олди. Яқинда эса барча нефтьимизни ноқонуний равишда олиб қўйишди. Венесуэлада фаолият юритаётган Америка компаниялари ҳайдаб юборилди”, деди АҚШ президенти.
Президент Вашингтон бунга жим қараб турмаслигини ва Венесуэлага “рухсат берилмаган” ишларни қилишига йўл қўймаслигини алоҳида таъкидлади.
“Улар бизнинг нефть ҳуқуқларимизни, бизга тегишли бўлган ҳамма нарсани тортиб олди. Бундан буён бундай қила олишмайди. Биз ҳуқуқларимизни қайтариб оламиз”, дея қўшимча қилди у.
Маълумот ўрнида, Трамп 17 декабрь куни санкциялар остидаги барча нефть танкерларининг Венесуэлага кириши ва ундан чиқишига “тўлиқ ва мутлақ” блокада жорий этишни буюрган. У Венесуэла ҳукуматини “хорижий террорчи ташкилот” деб эълон қилган.
Трамп буни мамлакат “АҚШ бойликларини ўғирлагани, терроризм, гиёҳванд моддалар контрабандаси ва одам савдосига алоқадор экани” билан изоҳлади. Венесуэла президенти бу баёнотга муносабат билдириб, Трампни “мустамлакачилик” амбицияларини яширганликда айбламоқда. Шунингдек, у АҚШ президентини “қўғирчоқ ҳукумат” ўрнатишга уринаётганликда айблаган.
