АҚШ ҳукумати Венесуэла нефтининг биринчи партиясини сотишни якунлади. Бу январь ойи бошида Каракас ва Вашингтон ўртасида имзоланган 2 миллиард долларлик келишувнинг бир қисмидир. Бу ҳақда Reuters ва CNN хабар берди.
АҚШ расмийсининг 14 январь куни маълум қилишича, илк нефть савдосидан тушган қарийб 500 миллион доллар миқдоридаги маблағ АҚШ ҳукумати назоратидаги банк ҳисоб рақамларида сақланмоқда. Бу борадаги тегишли буйруқ 9 январь куни имзоланган.
Маблағлар Қатарда сақланади
Соҳадаги манбаларнинг билдиришича, асосий ҳисоб рақам Қатарда жойлашган. Ушбу давлат маблағлар АҚШ розилиги билан ҳаракатланадиган ва мусодара қилиниш хавфи бўлмаган нейтрал ҳудуд сифатида танланган.
Расмий америкалик вакилнинг қўшимча қилишича, яқин кунлар ва ҳафталар ичида нефтьнинг навбатдаги партиялари сотилиши кутилмоқда. Январь ойи бошида АҚШ Венесуэлага ҳужум қилиб, мамлакат президенти Николас Мадурони қўлга олганидан сўнг, президент Дональд Трамп Венесуэланинг улкан нефть захираларидан фойдаланиш режасини очиқ эълон қилган эди.
100 миллиард долларлик сармоя
Жума, 9 январь куни Трамп нефть саноати Венесуэланинг вайрон бўлган энергетика секторини қайта тиклаш учун камида 100 миллиард доллар сармоя киритишини айтганди. Бироқ бу рақам айнан қаердан олингани ҳозирча номаълум.
Оқ уйда ўтган учрашувда АҚШ энергетика компаниялари раҳбарлари маъмуриятнинг ушбу режаларига шубҳа билан қаради. Хусусан, ExxonMobil бош директори Даррен Вудс Венесуэладаги вазиятни инвестиция учун яроқсиз деб баҳолаган.
“Бу инвестиция киритиб бўлмайдиган жой. Сармоядан қандай фойда олишимизни тушунишимиз учун ҳам бир қатор ҳуқуқий ва тижорий асослар яратилиши керак”, деган у.
Бошқа бир қатор топ-менежерлар ҳам ихтилофлар гирдобида қолган ушбу Лотин Америкаси давлатида бизнес юритишга тайёр эмаслигини билдирган. Жума кунги музокаралар якунида Трамп ва унинг ёрдамчилари компаниялардан миллиардлаб доллар сармоя киритиш бўйича ҳеч қандай аниқ мажбурият ололмаган.
Чегирмали нархлар
Оқ уй матбуот котиби Тейлор Рожерснинг таъкидлашича, Трамп жамоаси Венесуэла инфратузилмасини тиклаш учун мисли кўрилмаган сармоя киритишга тайёр бўлган нефть компаниялари билан ижобий музокараларни давом эттирмоқда. Шунингдек, 14 январь кунги ҳисоботларга кўра, Венесуэла хом нефти трейдерларга Канада каби рақобатчи давлатлар нефтига қараганда сезиларли чегирма билан таклиф қилинмоқда.
