Парагвай президенти Сантяго Пеня 11 декабрь куни рафиқаси билан Ўзбекистонга келди. Бу ҳақда ЎзА хабар қилди.
Расмий ташриф билан келган олий мартабали меҳмонни “Тошкент-Ҳумо” халқаро аэропортида Ўзбекистон бош вазири ўринбосари Жамшид Қўчқоров, ТИВ раҳбари Бахтиёр Саидов ва бошқа расмийлар кутиб олди.
Тошкент шаҳрида бўлиб ўтадиган олий даражадаги музокараларда Ўзбекистон билан Парагвай ўртасида сиёсий, савдо-иқтисодий, маданий ва гуманитар соҳалардаги ҳамкорликни ривожлантириш истиқболлари муҳокама қилиниши режалаштирилган.
Жумладан, қишлоқ хўжалиги, озиқ-овқат ва кимё саноати, рақамлаштириш, туризм ҳамда спорт соҳаларида амалий шерикликни ўрнатишга алоҳида эътибор қаратилади.
Парагвай етакчиси, шунингдек, Халқаро автомобиль федерацияси Бош ассамблеясида ва федерация шафелигида ўтказиладиган мусобақалар ғолибларини тақдирлаш маросимида иштирок этади.
