Венесуэла президенти Николас Мадуро АҚШ президенти Дональд Трампдан “истеъфо келишуви” доирасида 200 миллион долларни ўзига қолдиришни ва сиёсий бошпана беришни илтимос қилган. Бу ҳақда The Telegraph газетаси ўз манбаларига таяниб хабар бермоқда.
“Манбаларга кўра, Венесуэла президенти Дональд Трамп билан истеъфога чиқиш ва мамлакатни тарк этиш бўйича келишув доирасида шахсий бойлигидан 200 миллион долларни сақлаб қолиш, ўз амалдорларига амнистия бериш ва дўстона давлатда бошпана олишни сўраган”, дея таъкидланади нашр хабарида.
Газета суҳбатдошларидан бирининг таъкидлашича, Трамп бошпана вариантлари сифатида Хитой ёки Россияни таклиф этган, Мадуро эса Ғарбий яримшарда, Куба сингари дўстона мамлакатда қолишни мақсад қилган. Нашрнинг ёзишича, эҳтимолий келишув варианти сифатида Қатар ҳам кўриб чиқилган.
Бир неча кун аввал Трамп Венесуэла устидаги ва унинг атрофидаги ҳаво ҳудудини авиакомпаниялар, наркотик моддалар ва одам савдогарлари учун ёпилганини эълон қилган эди. Ушбу баёнот Кариб денгизида Америка ҳарбий кучларининг тўпланиши фонида янгради.
The Washington Post газетасининг ёзишича, АҚШ ҳарбий самолётлари Венесуэла атрофидаги ҳудудларда мунтазам равишда патруллик қилмоқда. Америка оммавий ахборот воситалари Қўшма Штатлар яқин вақт ичида ҳужум қилиши мумкинлигини бир неча бор таъкидлашган.
Венесуэланинг собиқ ҳарбий разведка бошлиғи, “Эл Полло” лақаби билан танилган Уго Армандо Карвахаль Барриос федерал қамоқхонадан туриб АҚШ президенти Дональд Трампга ёзган хатида президент Николас Мадуро ҳукуматини “наркотеррорчи ташкилот” сифатида фаолият юритишда айблаганди.
Венесуэла президенти Николас Мадуро ноябрь ойи охирида Дональд Трамп билан телефон орқали мулоқотдан сўнг, АҚШ томонидан берилиши мумкин бўлган хавфсизлик кафолати остида мамлакатни тарк этиш имкониятини йўқотди.
