Жиноят ишлари бўйича Ғузор тумани суди ўз уйига ўғри ёллаб, уй бекаси бўлган аммасининг ўлимига сабаб бўлган келин ва унинг шерикларига ҳукм ўқиди, дея хабар бермоқда “Дарё” мухбири.
Бунга қадар, суд мажлисларида айбланувчилар ва гувоҳлар билдирган кўрсатувлари асосида, Қашқадарё вилоятида содир бўлган ушбу мудҳиш воқеа ҳақида ҳикоя қилган эдик.
Ўғрилик ва унинг ортидан содир этилган қотиллик воқеаси 2025-йилнинг 23 май кунидан 24 май кунига ўтар кечаси содир этилган.
Келин ўз турмуш ўртоғининг аммаси уйида опа-сингиллари ва жиянлари Жанубий Кореяда ишлаб топган пулларини йиғишидан хабардор бўлган. Ҳаттоки, аммасига пулларни ҳисоб-китоб қилишда ҳам кўмаклашган ва қаерда сақланишини билган.
Келин эри ишлаш мақсадида Жанубий Кореяга кетганидан фойдаланиб, уйдаги бор пуллар ва тилла тақинчоқларни ўзлаштиришни режалаштирган. Бу мақсади йўлида эса синглисига уйланмоқчи бўлиб юрган йигитдан фойдаланган ва унга тўй харажатлари учун мўмайгина пул таклиф қилган.
Бўлажак куёв бу ишга дўстини ҳам жалб қилади. Бироқ, у ўғриликни амалга ошириш режа қилинган кунда фикридан қайтиб қолади. Келин куёвини ишни тезлаштиришга ундайди ва воқеа 23 май 23:00 дан бошланади.
Келин топшириғига кўра, куёв аввал камерани ўчириш учун электрни тармоқдан узади. Уй эгаси чироқ ўчгани учун ухлолмайди. Тунги соат 1:00 лар атрофида уй эгаси хонадан чиққанида куёв унга ташланиб, итариб йиқитади ва бўғиб ўлдиради. Пуллар ва тақинчоқлар ўғирлангач, уйга ўт қўйиб юборади.
Шундан сўнг, куёв қўлга киритган 20 минг доллар ва 60 миллион сўм пулдан бир қисмини буюртмачига беради. Воқеанинг эртасига эса Тошкентга кетади ҳамда буюртмачининг синглиси билан кўришиб, ижарага янги уй олгани ва кўчиб ўтиши кераклигини айтади. Қолаверса, унга кийим-кечак олиб беради, дўстига эга телефон совға қилиб, 100 доллар беради, яна 300 долларни акасига бериб қўйишни илтимос қилади. Учовлон бозордан уйига қайтаётганда ИИБ ходимлари томонидан қўлга олинади.
Судья Лазиза Расулова мазкур воқеа иштирокчиларини айбдор деб топиб, уларга нисбатан суд ҳукмини ўқиб эшиттирди.
Қотилликни содир этган куёв Р.Р. 18 йилга, унга дастлаб шерикчилик қилиб, кейин ортга чекинган дўсти Қ.Б. 10 йилга озодликдан маҳрум қилинди. Ўғриликни режалаштирган келин М.А.га эса 13 йил-у 3 ойга, унинг синглиси С.А.га 11 йил-у 1 ой муддатга қамоқ жазоси тайинланди.
Шунингдек, судланувчилардан жабрланувчилар фойдасига 1 миллиард 540 миллион сўм етказилган зарар ундириладиган бўлди.
Эътиборли жиҳати, суд мажлислари давомида жабрланувчилар хонадондан 150 минг доллар, 300 миллион сўм ва қимматбаҳо тилла тақинчоқлар ўғирланганини даъво қилишганди. Судланувчилар Тошкентда қўлга олинган вақтда уларнинг олдидан арзимас миқдордаги валюта ва сўм чиққан. Суд давомида гумондорлар қолган пуллар қани деган саволга, уларни ушлаб, Қашқадарёга олиб келган тезкор ходимлар олиб қўйди, дея жавоб беришган.
Суд мазкур ҳолатни ҳам инобатга олган ҳолда, ички ишлар ходимлари ҳаракатига, қолаверса, ўғриликни режалаштирган келиндан 10 минг доллар пулни совға сифатида қабул қилиб олган фуқаро ҳаракатига ҳуқуқий баҳо берилиши учун прокуратурага хабарнома юборди.
Ушбу мудҳиш воқеа ҳақида тайёрланган ҳикояни қуйидаги видеода томоша қилишингиз мумкин.
