Россиянинг яқин иттифоқчиси ҳисобланган Беларусьда 31 нафар украиналикка амнистия эълон қилинди. Бу ҳақда The MoscowTimes хабар берди.
Мазкур афв мамлакат президенти Александр Лукашенко ва АҚШ етакчиси Дональд Трамп ўртасидаги келишув доирасида амалга оширилди. Трамп 1994 йилдан буён ҳукмронлик қилиб келаётган, эркин ОАВ ва сиёсий мухолифатни йўқ қилган Лукашенко билан алоқалар ўрнатиб, уни сиёсий маҳбусларни озод қилишга ундаган.
Бунинг эвазига Вашингтон Беларусь давлат авиакомпанияси Belavia’га нисбатан санкцияларни қисман бекор қилган, бу эса компанияга ўз флоти, шу жумладан, Boeing самолётларига хизмат кўрсатиш ва эҳтиёт қисмларни сотиб олиш имконини беради.
“Президент мамлакатимиз ҳудудида жиноий ҳуқуқбузарлик содир этган 31 нафар Украина фуқаросини афв этди”, деди Лукашенконинг матбуот котиби Наталя Эйсмонт.
Матбуот котиби, бу ҳаракат Украинадаги урушга ечим топиш учун имкон яратишга қаратилганини қўшимча қилган. Эйсмонтга кўра, кимлиги ошкор этилмаган украиналиклар айни дамда Киевга қайтарилмоқда.
Беларусьда одатда ҳукуматга қарши чиққан ёки танқид қилган шахслар экстремизмда айбланиб, узоқ муддатли қамоқ жазосига ҳукм қилинади. Озод қилинган украиналикларга нисбатан қандай айбловлар қўйилгани ҳозирча аниқ эмас.
Лукашенко бундан олдин ҳам ўнлаб сиёсий маҳбусларни, жумладан, таниқли мухолифатчилар, журналистлар ва руҳонийларни озод қилган эди. Маълумотларга кўра, Беларусь қамоқхоналарида ҳали ҳам 1000 дан ортиқ сиёсий маҳбус сақланмоқда.
